Navoiyda odil sudlovni amalga oshirishda qonuniylikni buzgan sudya ishdan olindi

Sudyalar oliy kengashi qarori bilan fuqarolik ishlari bo‘yicha Karmana tumanlararo sudining sudyasi lavozimidan ozod etildi.

Ma’lum qilinishicha, odil sudlovni amalga oshirishda qonuniylikni buzgani uchun Navoiy viloyati fuqarolik ishlari bo‘yicha Karmana tumanlararo sudining sudyasi Baxtiyor Qutliyev lavozimidan ozod etilib, vakolatlari muddatidan ilgari tugatilgan.

Shuningdek, mas’uliyatsizligi va faoliyatida yo‘l qo‘ygan kamchiliklari uchun:

• Xorazm viloyat sudining fuqarolik ishlari bo‘yicha sudyalari G‘aybulla Mirzayev va Xushnud Boltayev;
• Xorazm viloyati jinoyat ishlari bo‘yicha Yangiariq tuman sudining raisi Jamolbek Jumaniyozov;
• Namangan viloyati fuqarolik ishlari bo‘yicha Namangan tumanlararo sudining sudyasi Ulug‘bek Hamdamov;
• Andijon viloyati jinoyat ishlari bo‘yicha Qo‘rg‘ontepa sudining sudyasi Ozodbek Ne’matullayev intizomiy jazoga tortilgan.

Eslatib o‘tamiz, yanvar boshlarida ham mamlakatda mas’uliyatsizlikka yo‘l qo‘ygan 5 nafar sudya intizomiy jazoga, Toshkentda mas’uliyatsizlikka yo‘l qo‘ygan 9 nafar sudya esa javobgarlikka tortilgandi. Shuningdek, bir qator qonun buzilishi holatlariga qo‘l urgan besh nafar sudyaga ham jazo tayinlangan.