“O‘zgidromet” Qoraqalpog‘istonning ayrim hududlarida kuzatilayotgan kuchli shamol 6-mart kuni ham saqlanib qolishini ma’lum qildi.
Qayd etilishicha, 2022-yil 4–5-mart kunlari Qoraqalpog‘istonning Qozog‘iston bilan chegaradosh hududlarida 20–25 metr/sekund tezlikdagi kuchli shamollar kuzatilib, ba’zi joylarda shamol tezligi 30 metr/sekundgacha kuchaygan. Bundan avval Qoraqalpog‘iston hududlarida quruq va iliq ob-havo kuzatilgan edi.
Kuchli shamollar yerning qurigan yuzasidan qum va chang ko‘tarilishiga hamda ayrim joylarda ko‘rinuvchanlikning 180 metrgacha kamayishiga olib keldi.
“O‘zgidromet” tomonidan ob-havo sharoitining keskin o‘zgarishi, kuchli shamollar va chang to‘zonlar ko‘tarilishi haqida oldindan ogohlantirish berilgandi.
“5-mart soat 13:00 holatiga respublika hududida yog‘ingarchilik yog‘moqda, bu esa o‘z navbatida qum va changli bo‘ronlarni atmosfera havosiga ko‘tarilishini oldini oladi”, – deyiladi xabarda.
Avvalroq Qoraqalpog‘istonda qum bo‘roni kuzatilayotgani haqida xabar berilgandi.
Izoh (0)