4-mart kuni Turkiya va O‘zbekiston o‘rtasida diplomatik munosabatlar o‘rnatilganiga 30 yil to‘ldi. Shu munosabat bilan Turkiyaning O‘zbekistondagi favqulodda va muxtor elchisi Olgan Bekar jurnalistlar bilan uchrashuv o‘tkazdi, deb xabar bermoqda “Daryo” muxbiri.
“2019-yilda 2,3 milliard AQSh dollari ko‘rsatkichi bilan ikki tomonlama savdo hajmi bo‘yicha erishgan rekord natija 2021-yilda yangilanib, 3,6 milliard dollarga yetdi. Biz uchun yana bir quvonarli jihat shundaki, mamlakatlar o‘rtasidagi import va eksport hajmining deyarli tenglashgani bo‘ldi. Bu statistik ma’lumotlar savdo aloqalarning bir-birini to‘ldirib, qo‘llab-quvvatlovchi mohiyatda ekanini ko‘rsatadi.
2021-yilda O‘zbekistondagi turk firmalarining soni va turizm statistikasi pandemiya sharoitlariga qaramay jadal ortib, o‘z tarixidagi eng yuqori darajaga erishdi. Prezidentlar tomonidan belgilab berilgan o‘zaro tijorat yillik hajmning 5 milliard dollarlik marraga yetkazish bo‘yicha maqsadga qanchalik yaqinlashganimizni isbotladi”, — deydi Olgan Bekar.
Elchining ta’kidlashicha, “2022—2026-yillarga mo‘ljallangan Taraqqiyot strategiyasining ham shu muvaffaqiyat tarixining yangi bir bobi bo‘lishiga shubha yo‘q”.
Olgan Bekarning ma’lum qilishicha, yaqin kunlarda Turkiya prezidenti Rajab Toyyib Erdo‘g‘onning O‘zbekistonga tashrifi kutilmoqda. Elchi hozircha tashrif sanasi aniq emasligini ta’kidladi.
Izoh (0)