Surxondaryo viloyati Sho‘rchi tumanida tanishining videolarini ijtimoiy tarmoqlarga joylashtirmaslik uchun pul talab qilgan erkak qo‘lga olindi. Bu haqda Tergov departamenti xabar qildi.
Qayd etilishicha, “Kakan” mahallasida yashovchi X.A. (40 yoshli) tuman ichki ishlar bo‘limi boshlig‘i nomiga ariza bilan murojaat qilgan. Unda 27-fevral kuni Sho‘rchi tumanida yashovchi X.M. (33 yoshli) unga tegishli sir saqlanishi lozim bo‘lgan video tasviri borligini aytib, qo‘rqitib, videolarni internet ijtimoiy tarmog‘iga tarqatib yubormaslik evaziga 1000 dollar pul talab qilganini aytgan. X.A. unga nisbatan qonuniy chora ko‘rishni so‘ragan.
Ariza yuzasidan shu kuni soat 22:00 larda IIB xodimlari tomonidan Sho‘rchi tumani “Bobur” mahallasi hududida joylashgan “Bobotog‘ go‘sht markazi” nomli oshxonada tezkor-tadbir o‘tkazilgan. Tadbir davomida X.M. kelishilgan puldan 500 dollarini olayotgan vaqtida tadbir ishtirokchilari tomonidan ashyoviy dalillar bilan ushlangan.
Holat yuzasidan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilgan. Hozirda jinoyat ishi yuzasidan dastlabki tergov harakatlari olib borilmoqda.
Izoh (0)