Shavkat Mirziyoyev va Pokiston bosh vaziri Imron Xon 3-mart kuni ommaviy axborot vositalari vakillari uchun brifing o‘tkazdi. Bu haqda Prezident matbuot xizmati xabar qildi.
Qayd etilishicha, Shavkat Mirziyoyev jurnalistlar bilan muloqotda Pokiston xalqini yaqinlashib kelayotgan Pokiston kuni bayrami bilan yana bir bor tabriklagan. Ushbu tashrif katta tarixiy voqea – mamlakatlar o‘rtasida diplomatik munosabatlar o‘rnatilganining 30 yilligi arafasida o‘tayotgani ramziy ma’noga ega ekanini alohida ta’kidlagan.
“Biz Pokiston bilan birgalikda nafaqat ikki mamlakat, balki strategik jihatdan muhim bo‘lgan Markaziy va Janubiy Osiyo mintaqalari o‘rtasidagi mustahkam hamkorlik ko‘prigini bunyod etyapmiz”, — deydi Shavkat Mirziyoyev.
Tashrif doirasida Imtiyozli savdo to‘g‘risidagi bitimning imzolangani muhim qadam bo‘ldi.
Farmatsevtika, to‘qimachilik, charm-poyabzal, oziq-ovqat, qishloq xo‘jaligi, qurilish, bank-moliya va boshqa asosiy yo‘nalishlarda kooperatsiyani kengaytirish yuzasidan muhim kelishuvlarga erishilgan. Tashrif arafasida o‘tkazilgan ishbilarmonlik tadbirlari natijasida umumiy qiymati 800 million dollarlik 60 ta yangi investitsiya va savdo kelishuvlari imzolangan.
Tomonlar Markaziy va Janubiy Osiyoning o‘zaro bog‘liqligini mustahkamlashga qaratilgan yirik qo‘shma transport-kommunikatsiya loyihalarini amalga oshirishni jadallashtirishga kelishib olgan. Pokiston hududi orqali xalqaro dengiz portlariga chiquvchi Termiz—Mozori Sharif—Kobul—Peshovar strategik temir yo‘lini qurish ishlarini yaqin muddatlarda boshlash muhimligi alohida ta’kidlangan.
“Asr loyihasi deb atalayotgan Termiz—Mozori-Sharif—Kobul—Peshovar temiryo‘li nafaqat mamlakatlarimiz, balki keng mintaqalarimiz xalqlari umumiy ravnaqiga hissa qo‘shadi, deb ishonamiz”, — deb ta’kidlagan Shavkat Mirziyoyev.
Hududlararo hamkorlikda ulkan salohiyat mavjudligi ta’kidlangan. Bu borada Namangan viloyati va Panjob provinsiyasi muvaffaqiyatli namuna ko‘rsatgan. Boshqa hududlar o‘rtasidagi aloqalarni yanada kengaytirish yuzasidan kelishuvga erishilgan.
Pokiston bosh vaziri bilan muzokaralar chog‘ida mintaqa kun tartibi va Afg‘onistondagi bugungi vaziyat yuzasidan samarali fikr almashilgan. Ushbu mamlakatda murakkablashayotgan gumanitar holat jiddiy tashvish va xavotir uyg‘otayotgani qayd etilgan.
Shavkat Mirziyoyev xalqaro hamjamiyatni afg‘on xalqiga yordam ko‘rsatish borasidagi sa’y-harakatlarni birlashtirishga chaqirgan. Mintaqaviy va xalqaro tashkilotlar doirasida birgalikda ishlash mexanizmlari yo‘lga qo‘yilgan. O‘zbekiston va Pokiston Birlashgan Millatlar Tashkiloti, Shanxay hamkorlik Tashkiloti, Islom hamkorlik tashkiloti, Iqtisodiy hamkorlik tashkilotida bir-birini qo‘llab-quvvatlashni davom ettirishda qat’iy ekanini tasdiqlagan.
Madaniy-gumanitar soha sheriklikning eng muhim va istiqbolli yo‘nalishlaridan biri sifatida belgilab olingan.
“Qadimiy Buyuk Ipak yo‘li chorrahasida joylashgan O‘zbekiston va Pokiston xalqlarini azaldan umumiy tarix, o‘xshash til va boy ma’naviy meros chambarchas bog‘lab turadi”, — deydi Shavkat Mirziyoyev.
O‘zbekistonda urdu tilini o‘rganishga qiziqish ortib borayotgani ta’kidlangan. Pokistonda ham Islomobod zamonaviy tillar universiteti, Panjob va Peshovar universitetlari kabi oliy ta’lim muassasalari negizida o‘zbek tili va adabiyoti, O‘zbekiston tarixini o‘rganishga katta et’ibor qaratilgan.
“Tashrif davomida salmoqli hujjatlar to‘plamini, jumladan, Strategik sheriklikning navbatdagi qadamlari to‘g‘risida qo‘shma deklaratsiyani imzoladik. Unda mamlakatlarimiz o‘rtasidagi hamkorlikni yanada kengaytirish bo‘yicha bo‘lajak sa’y-harakatlarimiz belgilab olingan. Ma’naviy ildizlardan kuch va ilhom olayotgan aloqalarimiz kelgusida ham xalqlarimizning orzu-intilishlariga va biz tuzayotgan katta-katta rejalarga mos ravishda yangi marralarga ko‘tariladi”, — degan O‘zbekiston prezidenti.
Eslatib o‘tamiz, Shavkat Mirziyoyev 3–4-mart kunlari Pokistonga tashrif buyurishi xabar qilingandi. Keyinroq davlat rahbari Pokistonga jo‘nab ketgani va yetib borgani haqida xabar berildi.
Izoh (0)