Farg‘ona viloyati Oltiariq tumanida 19-fevral kuni uch nafar fuqaro aloqa kompaniyasi ofisiga hujum uyushtirdi. Bu haqda Tergov departamenti xabar qildi.
Qayd etilishicha, shu kuni soat 00:17 da noma’lum shaxslar yuziga niqob taqib, pichoq bilan qurollanib, Oltiariq tumani O‘zbekiston ko‘chasida joylashgan uyali aloqa kompaniyasi dilerlik shoxobchasiga g‘ayriqonuniy tarzda kirgan. Ular shoxobchadagi T.Z.ga (21 yoshli) hujum qilib, pichoq tirab, hayot va sog‘liq uchun xavfli bo‘lgan zo‘rlik ishlatish bilan qo‘rqitgan. Qo‘llari bilan urib, tan jarohati yetkazib, shoxobchada bo‘lgan 5 million so‘m pulni talon-toroj qilib, hodisa bo‘lgan joyidan yashiringan.
Oqibatda T.Z. olgan tan jarohatlari bilan Oltiariq tuman tez tibbiy yordam markaziga murojaat qilgan. Ma’lumotnomaga ko‘ra, unga burun suyagining yopiq sinishi, burun sohasida shilingan jarohat tashxisi qo‘yilgan.
Mazkur holat yuzasidan Oltiariq tuman IIB huzuridagi Tergov bo‘linmasi tomonidan noma’lum shaxslarga nisbatan Jinoyat kodeksning 164-moddasi 3-qismi “v” bandi (uy-joyga, omborxona yoki boshqa binolarga g‘ayriqonuniy ravishda kirgan holda bosqinchilik) bilan jinoyat ishi qo‘zg‘atilgan.
Olib borilgan tergov tezkor harakatlari natijasida mazkur jinoyatni Oltiariq tumanida yashovchi A.X. (31 yoshli) va E.O. (30 yoshli) va M.A. (30 yoshli) tomonidan sodir etilgani aniqlangan. Ulardan jinoyatni sodir etishda foydalangan narsa va buyumlar hamda jinoiy yo‘l bilan qo‘lga kiritilgan pullar evaziga sotib olingan buyumlar ashyoviy dalil tariqasida rasmiylashtirib olingan.
Hozirda yuqoridagi shaxslar jinoyat ishida gumon qilinuvchi tariqasida jalb qilinib, protsessual tartibda ushlangan. Tergov harakatlari davom etmoqda.
Mavzuga doir:
Izoh (0)