Polsha orqali Ukrainadan evakuatsiya qilingan O‘zbekiston fuqarolarining soni 2 374 nafarga yetdi

Uzbekistan Airways’ning 10 ta samolyoti yordamida Ukrainadan Polsha orqali evakuatsiya qilingan O‘zbekiston fuqarolari soni 2 374 nafarga yetdi. Bu haqda “Dunyo” agentligi xabar berdi.

3-mart kuni Toshkent vaqti bilan soat 19:00 holatiga ko‘ra, “Karchova” nazorat-o‘tkazish punktida vatanga uchib ketish niyatida bo‘lgan 500 ga yaqin O‘zbekiston fuqarosi to‘planib turibdi.

Ma’lum qilinishicha, “Karchova” nazorat-o‘tkazish punkti rahbariyati qochoqlar, jumladan, boshqa davlatlar fuqarolari soni ko‘paygani sababli to‘planish nuqtasini bosqichma-bosqich bo‘shatishni so‘ralmoqda. Bu so‘rovlarni inobatga olib, kuniga 3 marotabagacha tashkil etilayotgan maxsus reyslarni o‘z vaqtida to‘ldirish uchun O‘zbekiston fuqarolari muntazam ravishda avtobuslarda Katovitse aeroportiga (360 kilometr) olib borilmoqda.

Katovitse shahri aeroporti to‘lgan. Elchixona talabiga binoan shahar meriyasi aeroport binosiga tartibli o‘tish va yo‘lovchilarni ro‘yxatga olishni tashkil qilgan. Tartib politsiya va mahalliy ko‘ngillilar tomonidan nazorat qilinyapti. Bolali ayollar va keksalar uchun maxsus yo‘laklar yaratilgan. Barcha fuqarolarga oldindan tayyorlangan ro‘yxatlar asosida xizmat ko‘rsatilmoqda.

O‘zbekistonlik diplomatlar va Polsha shahri hokimiyati tomonidan fuqarolarni uzluksiz va tartibli evakuatsiya qilish bo‘yicha ko‘rilayotgan chora-tadbirlarga qaramay, subyektiv omillar bilan bog‘liq ayrim muammolar mavjud. Charchagan va tushkunlikka fuqarolar eng yaqin evaukuatsiya reyslarida uchib ketishga urinmoqda, bu esa ro‘yxatga olish tartibining buzilishiga olib kelyapti. Bort qo‘nganda ayollar, qariyalar va bolalarga ustuvorlik berilmoqda.

“Diplomatik vakolatxonamiz xodimlari vaziyatni yumshatish uchun barcha choralarni ko‘rmoqda. O‘zbekistonning Polshadagi elchixonasi talabiga ko‘ra aeroportda faqat o‘zbekistonliklar uchun issiq ovqat tashkil etilgan. Aeroport yaqinida tez tibbiy yordam ko‘rsatish uchun uchta avtomashina doimiy navbatchilik qilyapti. Aeroport rahbariyati tomonidan bolali onalarning dam olishi uchun maxsus qulayliklar ajratilgan. Evakuatsiya davri mobaynida turli sabablarga ko‘ra o‘zlari bilan zarur hujjatlari bo‘lmagan O‘zbekiston fuqarolariga vataniga qaytish uchun 240 dan ortiq sertifikatlar berilgan”, — deyiladi xabarda.

Ukrainadan evakuatsiya qilinayotgan o‘zbekistonliklarning dastlabki guruhi 28-fevral kuni, ikkinchi guruhi esa 1-mart kuni Toshkentga yetib keldi. 2-mart kuni yana ikkita maxsus reys amalga oshirilgan. Katovitse shahridan Toshkentga 251 nafar O‘zbekiston fuqarosi bo‘lgan oltinchi samolyot 2-mart kuni soat 20:20 da, yettinchisi 3-mart kuni 00:30 da kelib qo‘ngandi.