Шавкат Мирзиёев ва Покистон бош вазири Имрон Хон 3 март куни оммавий ахборот воситалари вакиллари учун брифинг ўтказди. Бу ҳақда Президент матбуот хизмати хабар қилди.
Қайд этилишича, Шавкат Мирзиёев журналистлар билан мулоқотда Покистон халқини яқинлашиб келаётган Покистон куни байрами билан яна бир бор табриклаган. Ушбу ташриф катта тарихий воқеа – мамлакатлар ўртасида дипломатик муносабатлар ўрнатилганининг 30 йиллиги арафасида ўтаётгани рамзий маънога эга эканини алоҳида таъкидлаган.
«Биз Покистон билан биргаликда нафақат икки мамлакат, балки стратегик жиҳатдан муҳим бўлган Марказий ва Жанубий Осиё минтақалари ўртасидаги мустаҳкам ҳамкорлик кўпригини бунёд этяпмиз», — дейди Шавкат Мирзиёев.
Ташриф доирасида Имтиёзли савдо тўғрисидаги битимнинг имзолангани муҳим қадам бўлди.
Фармацевтика, тўқимачилик, чарм-пойабзал, озиқ-овқат, қишлоқ хўжалиги, қурилиш, банк-молия ва бошқа асосий йўналишларда кооперацияни кенгайтириш юзасидан муҳим келишувларга эришилган. Ташриф арафасида ўтказилган ишбилармонлик тадбирлари натижасида умумий қиймати 800 миллион долларлик 60 та янги инвестиция ва савдо келишувлари имзоланган.
Томонлар Марказий ва Жанубий Осиёнинг ўзаро боғлиқлигини мустаҳкамлашга қаратилган йирик қўшма транспорт-коммуникация лойиҳаларини амалга оширишни жадаллаштиришга келишиб олган. Покистон ҳудуди орқали халқаро денгиз портларига чиқувчи Термиз—Мозори Шариф—Кобул—Пешовар стратегик темир йўлини қуриш ишларини яқин муддатларда бошлаш муҳимлиги алоҳида таъкидланган.
«Аср лойиҳаси деб аталаётган Термиз—Мозори-Шариф—Кобул—Пешовар темир йўли нафақат мамлакатларимиз, балки кенг минтақаларимиз халқлари умумий равнақига ҳисса қўшади, деб ишонамиз», — деб таъкидлаган Шавкат Мирзиёев.
Ҳудудлараро ҳамкорликда улкан салоҳият мавжудлиги таъкидланган. Бу борада Наманган вилояти ва Панжоб провинцияси муваффақиятли намуна кўрсатган. Бошқа ҳудудлар ўртасидаги алоқаларни янада кенгайтириш юзасидан келишувга эришилган.
Покистон бош вазири билан музокаралар чоғида минтақа кун тартиби ва Афғонистондаги бугунги вазият юзасидан самарали фикр алмашилган. Ушбу мамлакатда мураккаблашаётган гуманитар ҳолат жиддий ташвиш ва хавотир уйғотаётгани қайд этилган.
Шавкат Мирзиёев халқаро ҳамжамиятни афғон халқига ёрдам кўрсатиш борасидаги саъй-ҳаракатларни бирлаштиришга чақирган. Минтақавий ва халқаро ташкилотлар доирасида биргаликда ишлаш механизмлари йўлга қўйилган. Ўзбекистон ва Покистон Бирлашган Миллатлар Ташкилоти, Шанхай ҳамкорлик Ташкилоти, Ислом ҳамкорлик ташкилоти, Иқтисодий ҳамкорлик ташкилотида бир-бирини қўллаб-қувватлашни давом эттиришда қатъий эканини тасдиқлаган.
Маданий-гуманитар соҳа шерикликнинг энг муҳим ва истиқболли йўналишларидан бири сифатида белгилаб олинган.
«Қадимий Буюк Ipak yo‘li чорраҳасида жойлашган Ўзбекистон ва Покистон халқларини азалдан умумий тарих, ўхшаш тил ва бой маънавий мерос чамбарчас боғлаб туради», — дейди Шавкат Мирзиёев.
Ўзбекистонда урду тилини ўрганишга қизиқиш ортиб бораётгани таъкидланган. Покистонда ҳам Исломобод замонавий тиллар университети, Панжоб ва Пешовар университетлари каби олий таълим муассасалари негизида ўзбек тили ва адабиёти, Ўзбекистон тарихини ўрганишга катта этъибор қаратилган.
«Ташриф давомида салмоқли ҳужжатлар тўпламини, жумладан, Стратегик шерикликнинг навбатдаги қадамлари тўғрисида қўшма декларацияни имзоладик. Унда мамлакатларимиз ўртасидаги ҳамкорликни янада кенгайтириш бўйича бўлажак саъй-ҳаракатларимиз белгилаб олинган. Маънавий илдизлардан куч ва илҳом олаётган алоқаларимиз келгусида ҳам халқларимизнинг орзу-интилишларига ва биз тузаётган катта-катта режаларга мос равишда янги марраларга кўтарилади», — деган Ўзбекистон президенти.
Эслатиб ўтамиз, Шавкат Мирзиёев 3–4 март кунлари Покистонга ташриф буюриши хабар қилинганди. Кейинроқ давлат раҳбари Покистонга жўнаб кетгани ва етиб боргани ҳақида хабар берилди.
Изоҳ (0)