Shavkat Mirziyoyev va Pokiston bosh vaziri Imron Xon raisligida 3-mart kuni ikki mamlakat rasmiy delegatsiyalari ishtirokida yig‘ilish o‘tkazildi. Bu haqda Prezident matbuot xizmati xabar qildi.
Qayd etilishicha, unda siyosiy, savdo-iqtisodiy, investitsiyaviy, transport va logistika, turizm, madaniyat sohalaridagi hamkorlikni rivojlantirish masalalari muhokama qilingan.
“Qadimiy Buyuk ipak yo‘lida joylashgan O‘zbekiston va Pokiston xalqlarini azaldan umumiy tarix, o‘xshash til va boy ma’naviy meros bog‘lab turadi. Biz bugun bu ko‘hna an’analarni qayta tiklayapmiz. Davlatlararo munosabatlarimiz strategik sheriklik darajasiga ko‘tarilganidan mamnunmiz”, – deydi Shavkat Mirziyoyev.
O‘zbekiston rahbari yaqin istiqbolda o‘zaro savdo hajmini 500 million dollar, kelgusida esa 1 milliard dollarga chiqarish imkoniyati borligini ta’kidlab, bu boradagi muhim yo‘nalishlarni ko‘rsatib o‘tgan. Avvalo, sanoat sohalarida kooperatsiya dasturini, savdo aylanmasi tarkibini kengaytirish bo‘yicha “yo‘l xaritasi”ni birgalikda ishlab chiqish zarurligi qayd etilgan.
Ikkinchi muhim yo‘nalish – mamlakat va mintaqalar o‘rtasida multimodal transport, yuk va havo tashuvlari bo‘yicha hamkorlikni kuchaytirish hisoblanadi. Tranzit va savdo bitimi kuchga kirgan, muntazam yuk tashuvlari uchun asos yaratilgan.
Mirziyoyev transport-logistika sohasidagi hamkorlikni rivojlantirish bo‘yicha loyihalarni amalga oshirish muhimligini yana bir bor ta’kidlagan.
“Termiz—Mozori Sharif—Kobul—Peshovar temiryo‘li bizning umumiy kelajagimizdir. Bu yo‘l bitsa, Pokistonni Markaziy Osiyo bilan bog‘laydigan, O‘zbekistonni Karachi, Gvadar va Qosim portlariga olib chiqadigan eng yaqin, arzon va xavfsiz yo‘lakni yaratamiz. Bu temir yo‘l mintaqalarimiz qiyofasini butunlay o‘zgartirib yuboradi”, – deya ta’kidlaydi O‘zbekiston rahbari.
Muzokarada ushbu loyihani yanada ilgari surish bo‘yicha kelishuvga erishilgan. Doimiy aviaqatnovlarni qayta tiklash istiqbollari muhokama qilingan.
Ikki mamlakat hududlari o‘rtasida to‘g‘ridan-to‘g‘ri aloqalar ham rivojlanayotgani aytilgan. Jumladan, Namangan viloyati va Panjob muzofoti ishbilarmonlari ko‘plab loyihalarni amalga oshirmoqda. Kelgusida Surxondaryo viloyati bilan Xayber-Paxtunxva provinsiyasi va boshqa hududlarda ham ana shunday samarali hamkorlikni yo‘lga qo‘yishga kelishib olingan/
O‘zbekiston prezidenti ziyoratlarni tizimli tashkil etish maqsadida qo‘shma guruh tuzish, ikki mamlakat Turizm vazirliklarining vakolatxonalarini ochishni taklif qilgan. Uchrashuvda ilm-fan, ekologiya, oliy ta’lim, san’at, kino, sport sohalaridagi aloqalarga ham e’tibor qaratilgan.
Hukumatlararo komissiya hamraislari, vazirlar erishilgan kelishuv va kelgusidagi rejalar haqida axborot bergan. Shavkat Mirziyoyev va Imron Xon ularning takliflarini qo‘llab-quvvatlab, tegishli ko‘rsatmalar bergan.
“O‘ylaymanki, bugungi ochiq va sermahsul muloqotlarimiz, imzolanadigan hujjatlar strategik sherikligimizning yangi istiqbolli yo‘nalishlarini ochadi. Eng asosiysi, biz – ikki birodar bir-birimizni yaxshi tushunamiz. Biz qo‘ygan katta marralarga erishish uchun hukumatlarimiz doimiy muloqotda bo‘lishlari zarur”, — degan Mirziyoyev.
Eslatib o‘tamiz, Shavkat Mirziyoyev 3–4-mart kunlari Pokistonga tashrif buyurishi xabar qilingandi. Keyinroq davlat rahbari Pokistonga jo‘nab ketgani va yetib borgani haqida xabar berildi.
Izoh (0)