Xorijlik ekspertlar tahlillariga ko‘ra, bola 3 yoshgacha onasi bilan bo‘lishi uning ruhiy rivojlanishiga yaxshi ta’sir qiladi. Bu haqda 4-mart kuni Toshkentda o‘tkazilgan matbuot anjumanida Maktabgacha ta’lim vazirligi bo‘lim boshlig‘i Bahrom Xidirboyev ma’lum qildi, deya xabar bermoqda “Daryo” muxbiri.
Bahrom Xidirboyevning ta’kidlashicha, hozirgi vaqtda asosiy vazifalardan biri bog‘chalarga 3 yoshdan 7 yoshgacha bo‘lgan bolalarni qamrab olishdan iborat.
“Bu vazifani to‘liq amalga oshirgach, ya’ni 80 foizga yetkazgandan keyin (hozir 71 foiz) 2 yoshlilar masalasi ham ko‘rib chiqiladi. Xorijlik ekspertlar tahlillariga ko‘ra, bola 3 yoshgacha onasi bilan bo‘lishi uning ruhiy rivojlanishiga juda yaxshi ta’sir qiladi. Rivojlangan davlatlarda ham bolalar 3 yoshdan bog‘chaga qabul qilinadi”, — dedi u.
Maktabgacha ta’lim vaziri o‘rinbosari Uzoqboy Begimqulovning qo‘shimcha qilishicha, avvalgi bolalarga vaqtinchalik saqlab turish nuqtayi nazaridan qaralgan bo‘lsa, endilikda bog‘chalarda to‘laqonli ta’lim jarayonlarini tashkil qilinmoqda.
“O‘yin texnologiyalari orqali bilim berish, belgilangan kompetensiyani egallashi bo‘yicha o‘quv jarayonlari o‘tkazilyapti. O‘quv jarayonlariga tayyor bo‘lish esa aynan 3 yoshdan boshlanishi maqsadga muvofiq”, — dedi Uzoqboy Begimqulov.
Anjumanda aytilishicha, ijtimoiy tarmoqlarda ko‘plab yosh oilalar, ishlaydiganlarning aksariyati bolalarini 2 yoshdanoq bog‘chaga berish masalasini ko‘tarmoqda. Bu masala kelajakda ko‘rib chiqiladi.
Avvalroq prezident Shavkat Mirziyoyev bog‘chalarga bolalarni 2 yoshdan qabul qilishga hali ozroq vaqt borligi, buning uchun mamlakat iqtisodiyotini salgina mustahkamlab olish lozimligini aytgandi. Ma’lumot uchun, Vazirlar Mahkamasining 2017-yil 19-iyuldagi qarori bilan bog‘chalarga qabul yoshi 3 yosh etib belgilangan.
Izoh (0)