Хорижлик экспертлар таҳлилларига кўра, бола 3 ёшгача онаси билан бўлиши унинг руҳий ривожланишига яхши таъсир қилади. Бу ҳақда 4 март куни Тошкентда ўтказилган матбуот анжуманида Мактабгача таълим вазирлиги бўлим бошлиғи Баҳром Хидирбоев маълум қилди, дея хабар бермоқда «Дарё» мухбири.
Баҳром Хидирбоевнинг таъкидлашича, ҳозирги вақтда асосий вазифалардан бири боғчаларга 3 ёшдан 7 ёшгача бўлган болаларни қамраб олишдан иборат.
«Бу вазифани тўлиқ амалга оширгач, яъни 80 фоизга етказгандан кейин (ҳозир 71 фоиз) 2 ёшлилар масаласи ҳам кўриб чиқилади. Хорижлик экспертлар таҳлилларига кўра, бола 3 ёшгача онаси билан бўлиши унинг руҳий ривожланишига жуда яхши таъсир қилади. Ривожланган давлатларда ҳам болалар 3 ёшдан боғчага қабул қилинади», — деди у.
Мактабгача таълим вазири ўринбосари Узоқбой Бегимқуловнинг қўшимча қилишича, аввалги болаларга вақтинчалик сақлаб туриш нуқтаи назаридан қаралган бўлса, эндиликда боғчаларда тўлақонли таълим жараёнларини ташкил қилинмоқда.
«Ўйин технологиялари орқали билим бериш, белгиланган компетенсияни эгаллаши бўйича ўқув жараёнлари ўтказиляпти. Ўқув жараёнларига тайёр бўлиш эса айнан 3 ёшдан бошланиши мақсадга мувофиқ», — деди Узоқбой Бегимқулов.
Анжуманда айтилишича, ижтимоий тармоқларда кўплаб ёш оилалар, ишлайдиганларнинг аксарияти болаларини 2 ёшданоқ боғчага бериш масаласини кўтармоқда. Бу масала келажакда кўриб чиқилади.
Аввалроқ президент Шавкат Мирзиёев боғчаларга болаларни 2 ёшдан қабул қилишга ҳали озроқ вақт борлиги, бунинг учун мамлакат иқтисодиётини салгина мустаҳкамлаб олиш лозимлигини айтганди. Маълумот учун, Вазирлар Маҳкамасининг 2017 йил 19 июлдаги қарори билан боғчаларга қабул ёши 3 ёш этиб белгиланган.
Изоҳ (0)