3 март куни пойтахтдаги муҳташам ресторанларнинг бирида актёр ва режиссёр Азиз Раметовнинг никоҳ оқшоми бўлиб ўтди. Бу йил 34 ёшни қаршилаган актёр Шаҳлохон Умарова исмли қизга уйланди. Актёр таклифига кўра «Дарё» интернет нашри жамоаси тўйга ташриф буюрди ва қизиқарли юлдузли тўйдан репортаж тайёрлади.
Бошқа тўйлардан фарқли равишда бу кеча ҳамкорлар кўмагида ўтказилди. Ҳатто тўй билан боғлиқ кўрсатув ҳам суратга олинди.
Тўйда ўзбек театрининг машҳур актрисалари билан бир қаторда, киноижодкорлар ва қўшиқчилар ҳам иштирок этишди. Назаримизда, бу тўйда қайси санъаткорларнинг иштирок этганидан кўра, кимлар иштирок этмаганини айтиш осонроқ бўлса керак. Чунки тўй ҳақиқий шоу-дастурига айланди.
— Бу тўйни Саида опа билан узоқ вақт кутдик. Саида Раметова қанчадан қанча тўйларни аъло даражада ўтказган, шу боис бугунги кеча ҳам файзли ўтмоқда. Тошкентда тўртта катта театр бўлса, барча актёрлар бугунги тўйда жамулжам бўлишди, — дейди актриса Хосият Ҳусанова.Тўйни Ўзбекистон халқ артисти Фарруҳ Зокиров очиб берди. Ундан кейин Шоҳруххон, Мавлуда Асалхўжаева, Ҳосила Раҳимова, Фарҳод Саидов, Шоҳрух рэпер ва Музаффар Абдуазимов каби санъаткорлар ўз қўшиқлари билан тўйга янада файз бағишлашди.
— Азиз 34 ёшни қаршилаб, бироз «ўтириб» қолганди. Хайриятки, бахти очилиб, куёвлик даражасига эришди. Ўз оилам номидан Раметовларни муборакбод этаман. Азизбек ва келинимизга бахт тилайман. Илоҳим, бешик тўйларида ҳам иштирок этиш насиб этсин, — дейди қизиқчи Шукурулло Исроилов.
— Устозимиз Саида опанинг қувончли кунларида иштирок этаётганимдан жуда хурсандман. Тўй ҳақиқатан ҳам файзли ўтди. Саида опам қатори бу тўйни бутун Ўзбек миллий академик драма театри актёрлари кутишди. Азизбекка чин дилдан бахт тилайман, — дейди актриса Дилноза Кубаева.
Одатда келин-куёвлар валсга тушишади. Азиз Раметовнинг никоҳ тўйи ҳам креатив янгиликларга бой тарзда ўтди. Келин-куёвлар бошқалардек валсга ёки сокин мусиқага рақс тушишмади. Балки Шоҳрух рэпернинг қўшиқларига ҳамоҳанг тарзда ҳаракатланишди.
Кўплаб ёшларнинг тўйида «келинсалом» айтиб, мухлислар олқишини олган актриса бугун қайноналик мақомида бўлишига қарамай, ўз келинига «келинсалом» айтди. Юлдузли кеча шу каби кутилмаган воқеаларга бой бўлди.
Эслатиб ўтамиз, актёр Шаҳло Умарова билан оила қурди. У 1993 йил таваллуд топган ва Nastarin collection брендига асос солган. Ҳунарманд қиз шу кунгача Озода Нурсаидова, Зарина Низомиддинова, Каниза каби шоу-бизнес вакилларининг либос безаклари бўйича ҳамкорлик қилган.
Изоҳ (0)