AQSh moliya vazirligi milliarder Alisher Usmonovga tegishli kompaniyalarni sanksiyalar ro‘yxatidan chiqarib tashladi. 3-mart kuni Xorijiy aktivlarni nazorat qilish boshqarmasi (OFAC) direktori Andrea Gaki tomonidan imzolangan hujjatda aytilishicha, Usmonov 50 foizdan ortiq ulushga ega bo‘lgan kompaniyalar ham sanksiyalarga duchor bo‘lmaydi.
Xorijiy aktivlarni nazorat qilish idorasi — AQSh Moliya vazirligining chet elliklar va xorijiy kompaniyalarga qarshi sanksiyalarni nazorat qiluvchi bo‘limidir. 3-mart kuni imzolangan bosh litsenziyada qayd etilishicha, 50 foiz va undan ortiq aksiyasi Alisher Usmonovga tegishli kompaniyalar “zararli xorijiy faoliyat uchun” bloklovchi sanksiyalar ostida qolmaydi.
Hujjatga ko‘ra, Usmonov OFAC tomonidan cheklovlar joriy etilgan shaxslar ro‘yxatida yo‘q – AQShda uning ishtirokidagi yuridik shaxslarning mulki va ulushlari blokdan chiqarilgan, ularga o‘z hisobvaraqlaridan mablag‘larni yechib olishga ruxsat berilgan. Ushbu istisno Usmonovning ilgari boshqa sabablarga ko‘ra cheklangan aktivlari yoki kompaniyalarning moliyaviy operatsiyalariga taalluqli emas, deyiladi OFAC hujjatida.
Avvalroq Oq uy matbuot xizmatida Rossiya elitasi, jumladan Alisher Usmonov, uning oila a’zolari va kompaniyalariga qarshi sanksiyalar joriy etgani haqida xabar berilgandi. Bunga qadar Usmonovga qarshi Buyuk Britaniya ham sanksiyalar e’lon qilgan.
Eslatib o‘tamiz, Germaniyada Alisher Usmonovning 156 metrlik “Dilbar” yaxtasi xatlovga olingan, “Everton” Alisher Usmonovga tegishli kompaniyalar bilan hamkorlik qilishni to‘xtatgan, shuningdek, u Yevropa Ittifoqining Rossiyaga qarshi sanksiyalari ro‘yxatiga kiritilgan.
Izoh (0)