4-martga o‘tar kechasi Ukrainaning Energodar shahri o‘qqa tutilishi oqibatida Yevropadagi eng yirik — Zaporojye atom elektr stansiyasining o‘quv binosida yong‘in sodir bo‘ldi. Bu haqda Ukraina Favqulodda vaziyatlar vazirligi xabar berdi. Ma’lumotlarga ko‘ra, yong‘in 2 ming metr maydonni egallagan bo‘lib, olov besh qavatli binoning yuqori uchta qavatini qamrab olgan.
Yong‘inni o‘chirishda 40 dan ortiq o‘t o‘chiruvchi ishtirok etgan va u mahalliy vaqt bilan soat 06:20 da bartaraf etilgan. Idoraning qo‘shimcha qilishicha, halok bo‘lganlar va jarohat olganlar haqida ma’lumot yo‘q.
MAGATEning ma’lum qilishicha, yong‘in AESning asosiy uskunlariga zarar yetkazmagan. Radiatsiya darajasi normada ekani aytilmoqda.
Yong‘in boshlangandan so‘ng Ukraina prezidenti Vladimir Zelenskiy tunda favqulodda videomurojaat yo‘llab, Yevropani “uyg‘onishga” chaqirdi.
Zelenskiy Rossiya tanklari yadro reaktor bloklarini o‘qqa tutayotganini aytdi. Uning so‘zlariga ko‘ra, faqat Yevropa zudlik bilan chora ko‘rish orqali rus qo‘shinlarini to‘xtata oladi.
“Rossiyadan boshqa hech bir davlat hech qachon yadroviy reaktorlarni o‘qqa tutmagandi. Tariximizda, insoniyat tarixida birinchi marta terrorchi davlat yadroviy terrorizmga qo‘l urdi”, — dedi Zelenskiy.
Zelenskiy yong‘inning ehtimoliy oqibatlarini 1986-yildagi Chernobil fojiasi bilan solishtirar ekan, Zaporjyeda portlash yuz bergan taqdirda butun Yevropani evakuatsiya qilishga to‘g‘ri kelishini aytdi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)