АҚШ молия вазирлиги миллиардер Алишер Усмоновга тегишли компанияларни санкциялар рўйхатидан чиқариб ташлади. 3 март куни Хорижий активларни назорат қилиш бошқармаси (OFAC) директори Андреа Гаки томонидан имзоланган ҳужжатда айтилишича, Усмонов 50 фоиздан ортиқ улушга эга бўлган компаниялар ҳам санкцияларга дучор бўлмайди.
Хорижий активларни назорат қилиш идораси — АҚШ Молия вазирлигининг чет элликлар ва хорижий компанияларга қарши санкцияларни назорат қилувчи бўлимидир. 3 март куни имзоланган бош лицензияда қайд этилишича, 50 фоиз ва ундан ортиқ акцияси Алишер Усмоновга тегишли компаниялар «зарарли хорижий фаолият учун» блокловчи санкциялар остида қолмайди.
Ҳужжатга кўра, Усмонов OFAC томонидан чекловлар жорий этилган шахслар рўйхатида йўқ – АҚШда унинг иштирокидаги юридик шахсларнинг мулки ва улушлари блокдан чиқарилган, уларга ўз ҳисобварақларидан маблағларни ечиб олишга рухсат берилган. Ушбу истисно Усмоновнинг илгари бошқа сабабларга кўра чекланган активлари ёки компанияларнинг молиявий операцияларига тааллуқли эмас, дейилади OFAC ҳужжатида.
Аввалроқ Оқ уй матбуот хизматида Россия элитаси, жумладан Алишер Усмонов, унинг оила аъзолари ва компанияларига қарши санкциялар жорий этгани ҳақида хабар берилганди. Бунга қадар Усмоновга қарши Буюк Британия ҳам санкциялар эълон қилган.
Эслатиб ўтамиз, Германияда Алишер Усмоновнинг 156 метрлик «Дилбар» яхтаси хатловга олинган, «Эвертон» Алишер Усмоновга тегишли компаниялар билан ҳамкорлик қилишни тўхтатган, шунингдек, у Европа Иттифоқининг Россияга қарши санкциялари рўйхатига киритилган.
Изоҳ (0)