Fransiya prezidenti Emmaunel Makron fransuzlardan respublika prezidenti lavozimiga yangi mandat berishlarini so‘radi, deb xabar beradi BFMTV.
“Men siz bilan birga asr chaqiriqlariga o‘ziga xos fransuz va Yevropa javoblarini topish uchun nomzodman. Men dunyodagi to‘ntarishlar tahdidi ostida qolgan qadriyatlarimizni himoya qilishga nomzodman. Men farzandlarimiz va nabiralarimiz uchun kelajak tayyorlashni davom ettiradigan nomzodman. Bugun va ertaga o‘zimiz uchun qaror qabul qila olishimiz uchun”, — deyiladi Makronning xalqqa yo‘llagan murojaatida.
“So‘nggi besh yil ichida ko‘plab sinovlardan o‘tdik. Terrorizm, pandemiya, zo‘ravonlikka qaytish, Yevropada urush. Fransiya bunday inqirozlar to‘plamiga kamdan kam duch kelgan. Biz uni birodarlik va qadr-qimmat ila kutib oldik”, — deb yozadi Fransiya prezidenti.
Uning so‘zlariga ko‘ra, millat “aqlbovar qilmaydigan tezlikdagi o‘zgarishlarni boshdan kechirmoqda: demokratiyaga tahdidlar, ortib borayotgan tengsizlik, iqlim o‘zgarishi, demografik o‘tishlar, texnologik islohotlar”. Makronning hisoblashicha, faqat jasorat, iroda va kelajakka ishtiyoqqa bo‘ysunmasdan muvaffaqiyatga erishish mumkin.
“Muammo bolaligimizdagi Fransiyani qayta tiklash emas, balki farzandlarimiz Fransiyasini qurishdir”, — deydi davlat rahbari.
“Mana nima uchun men respublika prezidenti sifatidagi yangi mandatga ishonchingizni so‘rayapman”, — deya tushuntiradi Makron. U uzoq vaqt davomida aprel oyida bo‘lib o‘tadigan prezidentlik saylovlariga oid rejalarini jamoatchilikka oshkor etmay kelayotgandi.
Fransiya OAVlarida e’lon qilinga prognozlarga ko‘ra, Makron prezidentlik saylov kampaniyasidagi boshqa ishtirokchilardan ko‘ra yuqori reytingga ega. Undan keyingi o‘rinda “Milliy uyushma” o‘ng partiyasidan nomzod Marin Le Pen ketmoqda. Biroq so‘rovlar saylovlarning ikkinchi turida Makron g‘alaba qozonishini ko‘rsatmoqda.
Ma’lumot uchun, 2014-yilgacha jamoatchilikka uncha tanish bo‘lmagan Makron o‘sha yili bosh vazir Manuel Vals hukumatida Fransiya iqtisodiyot vaziri etib tayinlangan. Bu lavozimda ikki yil faoliyat olib borgan Makron 2016-yilda o‘z partiyasini tuzib, vazirlikdan iste’fo bergan va prezidentlik saylovida qatnashish uchun nomzodini ilgari surgan. 2017-yil may oyida bo‘lib o‘tgan saylovda mutlaq g‘alaba qozonib, Fransiya respublikasining navbatdagi prezidenti etib saylangan — bu bilan u Fransiya respublikasi tarixida eng yosh prezident bo‘ldi.
Izoh (0)