Qashqadaryo viloyatining Shahrisabz tumanida joylashgan Suvtushar sharsharasi muzi eriy boshladi, deya xabar berdi “Daryo” manbasi.
Qayd etilishicha, Hisor davlat qo‘riqxonasi hududida joylashgan, balandligi 84 metr bo‘lgan sharshara 2021-yilning noyabr oyida muzlagan.
Ma’lum bo‘lishicha, Hisor davlat qo‘riqxonasi hududidan boshlanadigan va oqib o‘tadigan soylar, irmoqlar, daryolar turli shakl va ko‘rinishdagi sharsharalarni hosil qiladi. Ularning eng kattasi Suvtushar sharsharasi bo‘lib, sharshara qo‘riqxonaning Miraki bo‘limi Suvtushar soyining boshlanish qismida, dengiz sathidan 2100 metr balandlikda joylashgan.
Ushbu sharshara Hisor tog‘ tizmasining 4 metr balandlikdagi Osmontalash qorli qoyalaridan paydo bo‘lgan suvlar hisobiga hosil bo‘ladi. O‘ziga xos kuy chalib, sohibjamolning uzun yoyilgan kokillarini eslatuvchi suvning shiddatli oqimi ushbu sharshara suvini ko‘pirtirib, oppoq holatga olib keladi. Shuning uchun mahalliy aholi orasida gohida uni Suttushar sharsharasi ham deb atashadi.
Izoh (0)