Қашқадарё вилоятининг Шаҳрисабз туманида жойлашган Сувтушар шаршараси музи эрий бошлади, дея хабар берди «Дарё» манбаси.
Қайд этилишича, Ҳисор давлат қўриқхонаси ҳудудида жойлашган, баландлиги 84 метр бўлган шаршара 2021 йилнинг ноябрь ойида музлаган.
Маълум бўлишича, Ҳисор давлат қўриқхонаси ҳудудидан бошланадиган ва оқиб ўтадиган сойлар, ирмоқлар, дарёлар турли шакл ва кўринишдаги шаршараларни ҳосил қилади. Уларнинг энг каттаси Сувтушар шаршараси бўлиб, шаршара қўриқхонанинг Мираки бўлими Сувтушар сойининг бошланиш қисмида, денгиз сатҳидан 2100 метр баландликда жойлашган.
Ушбу шаршара Ҳисор тоғ тизмасининг 4 метр баландликдаги Осмонталаш қорли қояларидан пайдо бўлган сувлар ҳисобига ҳосил бўлади. Ўзига хос куй чалиб, соҳибжамолнинг узун ёйилган кокилларини эслатувчи сувнинг шиддатли оқими ушбу шаршара сувини кўпиртириб, оппоқ ҳолатга олиб келади. Шунинг учун маҳаллий аҳоли орасида гоҳида уни Суттушар шаршараси ҳам деб аташади.
Изоҳ (0)