Surxondaryo viloyati Denov tumanida noqonuniy hujra faoliyatiga chek qo‘yildi. Bu haqda Ichki ishlar vazirligi xabar qildi.
Qayd etilishicha, 2-yanvar kuni viloyat IIB terrorizm va ekstremizmga qarshi kurashish boshqarmasi, Denov tumani IIB Terrorizm va ekstremizmga qarshi kurashish bo‘limi hamda Davlat xavfsizlik xizmati Denov shahar bo‘limi xodimlari tomonidan hamkorlikda tezkor tadbirlar o‘tkazilgan. Tadbir davomida Denov shahrida yashovchi E.S. yashash xonadonida 2021-yilning yanvar oyidan boshlab hujra tashkil qilgani aniqlangan. U diniy adabiyotlardan foydalangan holda, viloyatning turli tumanlarida yashovchi maktab yoshidagi voyaga yetmagan bolalarga noqonuniy diniy ta’lim berib kelgan.
Fuqarodan diniy adabiyotlar xolislar ishtirokida tegishli tartibda hujjatlashtirilib olingan.
Holat yuzasidan E.S.ga nisbatan to‘plangan hujjatlar Ma’muriy javobgarlik to‘g‘risidagi kodeksning 241-moddasiga (diniy ta’limotdan saboq berish tartibini buzish) asosan ma’muriy bayonnoma rasmiylashtirilgan. Fuqaroning oilaviy sharoiti hisobga olinib, eng kam oylik ish haqining 10 barobari, ya’ni 2 million 700 ming so‘m miqdorida jarima jazosi tayinlangan.
Izoh (0)