Shavkat Mirziyoyev 1-mart kuni bo‘lib o‘tgan yig‘ilishda ayollarni kasbga o‘qitish, tadbirkorlikka jalb qilish masalalari yuzasidan ma’lumot berdi. Bu haqda prezident matbuot xizmati xabar qildi.
Qayd etilishicha, bugungi kunda 400 dan ortiq nodavlat notijorat tashkiloti ayollarni kasbga o‘qitish, ularni tadbirkorlikka jalb qilish, ijtimoiy yordam ko‘rsatish bo‘yicha yaxshi tajriba yaratgan. Shu bois qishloq joylarida bunday loyihalarni amalga oshirish uchun nodavlat tashkilotlarga 2 milliard so‘mgacha grantlar ajratiladi.
O‘zi yoki qaramog‘ida nogironligi bor yaqini bo‘lgan xotin-qizlarga ijtimoiy xizmatlar ko‘rsatish, ularni kasbga o‘qitish borasida nodavlat notijorat tashkilotlariga berilayotgan grantlar miqdori 5 baravarga oshirilib, 200 million so‘mgacha yetkaziladi. Bu mablag‘ amalda 40 million so‘mni tashkil etadi.
“Ayollar bandligini ta’minlash, ularni tadbirkorlikka jalb qilish uchun, qo‘shimcha shart-sharoitlar yaratamiz”, — deydi prezident.
Buning uchun tadbirkor ayollar ulushini hozirgi 25 foizdan 40 foizga yetkazish bo‘yicha 2022—2024-yillar uchun “Biznes ayollar” dasturi qabul qilinadi. Dastur ijrosiga jami 8 trillion so‘m mablag‘ yo‘naltiriladi.
Izoh (0)