Zelenskiyni o‘ldirish uchun Kiyevga “Vagner”ning 400 nafar yollanma jangarisi yuborilgan — The Times

Kreml topshirig‘iga ko‘ra “Vagner” xususiy harbiy kompaniyasining 400 dan ortiq yollanma jangarilari Kiyevda jang qilmoqda, deb xabar beradi The Times.

Nashr manbalariga ko‘ra, Kreml mamlakatdagi vaziyatni nazorat qilishiga yo‘l ochish uchun harbiylarga Ukraina prezidenti Vladimir Zelenskiy va Ukraina hukumati a’zolarini o‘ldirish vazifasi yuklangan.

The Times’ning yozishicha, Ukraina hukumati ushbu ma’lumotni 26-fevral kuni qo‘lga kiritgan va poytaxtda komendantlik soatini kuchaytirgan. Uni buzganlar “dushmanning qo‘poruvchi-razvedka guruhlari a’zolari” sifatida tan olinadi.

“Vagner” guruhi — OAVlarda Rossiya xususiy harbiy kompaniyasi deb ataluvchi norasmiy qurolli tuzilma. Ma’lumotlarga ko‘ra, 2014-yildan buyon guruh Ukraina va Suriya hududlarida jang qilgan. 2017-yilda “Vagner” guruhi AQSh sanksiyalar ro‘yxatiga kiritilgan.

24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun “maxsus harbiy operatsiya” boshlanganini e’lon qildi. Murojaatdan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi.

24-fevralda Rossiya Ukrainaga bostirib kirgach, Buyuk Britaniya mamlakatga qarshi yangi sanksiyalar qo‘llagan, xususan “Aeroflot” kompaniyasining qirollik hududiga parvozlarini taqiqlagan. AQSh prezidenti Jo Bayden Rossiya Ukraina hududiga bostirib kirgani va u yerda harbiy operatsiyalarni boshlagani uchun mamlakatga nisbatan yangi sanksiyalar joriy qilgan. Shuningdek, Bayden Rossiyaning Ukrainaga hujumi uchun mas’uliyat Vladimir Putinning zimmasida ekani, Rossiya ushbu harbiy operatsiya uchun jiddiy zarbalar qabul qilib olishi haqida gapirgan.

Keyinchalik 25-fevralda AQSh Putin, Lavrov va Shoyguga qarshi sanksiyalar e’lon qildi, shuningdek 26-fevralda Oq uyning Zelenskiyga Kiyevni tark etishida yordam berishga tayyorligi xabar qilindi. AQSh prezidenti Jo Bayden Ukrainaga harbiy ehtiyojlar uchun zudlik bilan moliyaviy yordam ko‘rsatishni buyurgan, Fransiya prezidenti Emmanuel Makron esa Ukrainadagi urushning uzoq davom etishini taxmin qilgan.