Avstraliya Putin, Shoygu va Lavrovning mamlakatga kirishini taqiqladi

Avstraliya Rossiyaning Ukrainadagi harbiy operatsiyasi tufayli Rossiya prezidenti Vladimir Putin va mamlakatning boshqa yuqori martabali amaldorlariga qarshi sanksiyalar joriy etdi. Bu haqda Avstraliya bosh vaziri Skott Morrison ma’lum qildi.

Shuningdek, Rossiya mudofaa vaziri Sergey Shoygu, tashqi ishlar vaziri Sergey Lavrov, bosh vazir Mixail Mishustin va ichki ishlar vaziri Vladimir Kolokolsevga qarshi ham cheklovlar joriy etilgan. Ularning barchasi mamlakat Xavfsizlik kengashi a’zolari bo‘lib, DXR va LXRning mustaqilligini tan olish masalasi bo‘yicha o‘tkazilgan ochiq yig‘ilishda ishtirok etgan.

Ushbu choralar Avstraliyaga kirishni taqiqlash va maqsadli moliyaviy sanksiyalarni o‘z ichiga oladi.

“Avstraliya ittifoqchilari va hamfikr davlatlar bilan Rossiyaga qarshi qo‘shimcha iqtisodiy sanksiyalar qo‘llash borasida ishlashni davom etadi”, — deya va’da bergan Morrison. Uning eslatishicha, hozirda 350 nafardan ortiq rossiyalik, xususan, oligarxlar, deputat va harbiylarga cheklov qo‘llanilgan. Bundan tashqari, Kanberra Belarusning 13 nafar jismoniy va yuridik shaxslariga, jumladan, mudofaa vaziri Viktor Xreninga nisbatan sanksiyalar qo‘llagan.

Morrisonning qo‘shimcha qilishicha, Avstraliya Rossiyaning Markaziy banki va qator moliyaviy tashkilotlarini SWIFT’dan uzish borasidagi Yevropa Ittifoqi va AQShning choralarini qo‘llab-quvvatlaydi.

24-fevral kuni Rossiya Ukrainaga nisbatan hujumni boshlaganidan keyin, Avstraliya bosh vaziri Skott Morrison mamlakat bir qator rossiyalik jismoniy shaxslarga qarshi sanksiyalar qo‘llanilishini ma’lum qilgandi. “Dastavval biz Rossiya Xavfsizlik kengashining sakkiz a’zosini mamlakatga kirishini taqiqlash va maqsadli moliyaviy sanksiyalarni joriy etamiz”, — degandi Morrison. Shu bilan birga, hukumat “Qrim va Sevastopolga qarshi” amaldagi sanksiyalarni kengaytirgan: endilikda ular “Donetsk va Lugansk hududlariga” ham taalluqli.