Ўзбекистоннинг давлат қарзи қанчага етганлиги маълум қилинди

Ўзбекистоннинг давлат қарзи қолдиғи 2021 йилда 26,3 млрд долларни ташкил қилди. Бу ҳақда Молия вазирлигининг шарҳидан маълум бўлди.

Қайд этилишича, давлат қарзининг ЯИМга нисбатан улуши 38 фоизга етган. Жами қарздан 23,6 млрд доллар — ташқи қарз, 2,7 млрд доллар — ички қарз.

2020 йилда давлат қарзи 23,4 млрд доллар бўлган эди. Шу тариқа у 11 фоизга ошди ва 2021 йил давомида 2,9 млрд долларга ўсди. Бироқ ЯИМ тез суратларда, яъни 9,4 млрд долларга ўсганлиги туфайли давлат қарзининг ЯИМга нисбатан улуши пасайди.

Халқаро валюта жамғармасининг мамлакатлар иқтисодиётига бағишланган ҳисоботига кўра, Ўзбекистон Республикасининг давлат қарзи бугунги кунда «мўътадил» даражада ҳисобланади.

Маълумот учун, давлат қарзи бўйича статистик маълумотлар халқаро молия ташкилотлари ва тижорат банклари тақдим этадиган маълумотлар асосида аниқлаштириб борилади.

Аввалроқ Ўзбекистоннинг январь ойидаги ташқи савдо айланмаси ҳажми маълум қилинган эди.