O‘zbekistonning Ukrainadagi elchixonasi mamlakatdagi o‘zbekistonlik fuqarolarni evakuatsiya qilish ishlari haqida qo‘shimcha ma’lumot berdi.
Qayd etilishicha, hozirda fuqarolar Ukraina–Polsha chegarasini kesib o‘tishni boshlagan. Ukraina va Polsha chegarachilari, birinchi navbatda, ayollar va bolalarni o‘tkazmoqda. Chegarani kesib o‘tish uzoq vaqt oladi. Birinchi guruh uchun bu jarayon 14 soat davom etgan. Lvovga ko‘p sonli qo‘shimcha evakuatsiya poyezdlari yetib kelgani hisobiga chegarani kesib o‘tish vaqti cho‘zilishi mumkin.
“Chegarada odamlarning ko‘pligi tufayli avval e’lon qilingan ‘yashil yo‘lak’ ishlamayapti, chegaradan o‘tish fuqaroligidan qat’i nazar, navbat asosida amalga oshirilmoqda. Chegarani kesib o‘tish piyoda amalga oshirilmoqda, shu munosabat bilan fuqarolarimizdan chegarada sovuq havo bo‘layotganini hisobga olishlarini so‘raymiz. Hujjatlari bo‘lmagan (u yoki bu sabablarga ko‘ra) fuqarolarimiz uchun shaxsni tasdiqlovchi hujjatning hech bo‘lmaganda qog‘oz ko‘rinishidagi nusxasi yoki mobil telefonida skaner qilingan nusxasi bo‘lishini so‘raymiz”, — deyiladi elchixona murojaatida.
Chegara oldidagi tirbandlik holatlari vaziyatdan kelib chiqqan holda elchixona ayollar va bolalarni imkoni boricha chegaraga yaqinroq joyga yetkazishni ta’minlaydi. Mustaqil ravishda chegaraga yetib borish imkoniyatiga ega bo‘lgan fuqarolarga to‘g‘ridan to‘g‘ri chegaraga borish tavsiya etiladi.
“Lvovga yetib kelgan hurmatli vatandoshlar, sizdan xotirjam bo‘lishingizni so‘raymiz. Afsuski, diasporamiz vakili M.Soliyev bir vaqtning o‘zida yuzlab odamlarning muammolarini jismonan hal qila olmaydi. Shu munosabat bilan, imkon qadar bir-biringizga yordam berishingizni, yurtdoshlarimizga kelishni muvofiqlashtirishda yordam beradigan ko‘ngillilar guruhlarini shakllantirishingizni iltimos qilib murojaat qilinmoqda. Xalqimizning milliy an’analariga asoslanib, yurtdoshlarimizdan, eng avvalo, ayollar, bolalar, talaba-yoshlar va keksalarga yordam berishlarini so‘raymiz”, — deyiladi xabarda.
Polsha tomonida O‘zbekistonning Polshadagi elchixonasi vakili joylashgan bo‘lib, fuqarolarni vatanga jo‘natish ishlarini muvofiqlashtiradi. Vakil hujjatlar rasmiylashtirish bilan aeroportda shug‘ullanadi.
Eslatib o‘tamiz, O‘zbekiston Tashqi ishlar vazirligi Ukraina hududida 4300 ga yaqin O‘zbekiston fuqarosi borligini ma’lum qilgandi.
O‘zbekistonning Ukrainadagi elchixonasi xabariga ko‘ra, 26-fevral kuni Toshkent vaqti bilan soat 20:30 da 90 dan ziyod O‘zbekiston fuqarolaridan iborat birinchi evakuatsiya guruhi Lvovdan “Krakovets” nazorat-o‘tkazish punkti yo‘nalishi bo‘ylab yo‘lga chiqqan.
Izoh (0)