Xitoy tashqi ishlar vaziri Van I Ukraina atrofidagi vaziyat yuzasidan Pekinning beshta tezislarini bayon qildi. Xitoy barcha davlatlarning suverenitetini himoya qilish tarafdori, shuningdek, Rossiyaning xavfsizlik kafolatlari bo‘yicha talablarini inobatga olishga chaqirgan.
Pekinning Ukraina atrofidagi vaziyat bo‘yicha pozitsiyasi:
- “NATOning sharqqa tomon kengayishiga doir ketma-ket beshta raund sharoitida Rossiyaning xavfsizlik bo‘yicha qonuniy talablari jiddiy qabul qilinishi va tegishli tarzda ko‘rib chiqilishi kerak”;
- “Xitoy barcha mamlakatlarning suvereniteti va hududiy yaxlitligini hurmat hamda himoya qilish tarafdori… Ushbu pozitsiya izchil va aniq, u Ukrainaga ham taalluqli”;
- “Xitoy Ukrainadagi vaziyatning rivojlanishini diqqat bilan kuzatib bormoqda, hozirgi holat — biz ko‘rishni istagan narsa emas”;
- “Xitoy Rossiya va Ukraina o‘rtasida to‘g‘ridan to‘g‘ri dialog hamda muzokaralarning tezroq boshlanishini olqishlaydi”;
- “BMT Xavfsizlik kengashi Ukraina masalasini tartibga solishda konstruktiv rol o‘ynashi, shuningdek, mintaqaviy tinchlik, barqarorlik va barcha mamlakatlar umumiy xavfsizligiga ustuvor ahamiyat berishi kerak”.
24-fevralda Rossiya Ukrainaga bostirib kirgach, Buyuk Britaniya mamlakatga qarshi yangi sanksiyalar qo‘llagan, xususan “Aeroflot” kompaniyasining qirollik hududiga parvozlarini taqiqlagan. 25-fevral kuni Kanada Putinning atrofidagilar, deputatlar va Rossiyaning 27 ta moliyaviy institutiga qarshi sanksiyalar kiritdi, Ukraina banklariga Rossiya va Belarus rubllarida operatsiyalar o‘tkazish taqiqlandi. Shuningdek, AQSh Putin, Lavrov va Shoyguga qarshi sanksiyalar e’lon qildi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)