Хитой ташқи ишлар вазири Ван И Украина атрофидаги вазият юзасидан Пекиннинг бешта тезисларини баён қилди. Хитой барча давлатларнинг суверенитетини ҳимоя қилиш тарафдори, шунингдек, Россиянинг хавфсизлик кафолатлари бўйича талабларини инобатга олишга чақирган.
Пекиннинг Украина атрофидаги вазият бўйича позицияси:
- «НАТОнинг шарққа томон кенгайишига доир кетма-кет бешта раунд шароитида Россиянинг хавфсизлик бўйича қонуний талаблари жиддий қабул қилиниши ва тегишли тарзда кўриб чиқилиши керак»;
- «Хитой барча мамлакатларнинг суверенитети ва ҳудудий яхлитлигини ҳурмат ҳамда ҳимоя қилиш тарафдори… Ушбу позиция изчил ва аниқ, у Украинага ҳам тааллуқли»;
- «Хитой Украинадаги вазиятнинг ривожланишини диққат билан кузатиб бормоқда, ҳозирги ҳолат — биз кўришни истаган нарса эмас»;
- «Хитой Россия ва Украина ўртасида тўғридан-тўғри диалог ҳамда музокараларнинг тезроқ бошланишини олқишлайди»;
- «БМТ Хавфсизлик кенгаши Украина масаласини тартибга солишда конструктив рол ўйнаши, шунингдек, минтақавий тинчлик, барқарорлик ва барча мамлакатлар умумий хавфсизлигига устувор аҳамият бериши керак».
24 февралда Россия Украинага бостириб киргач, Буюк Британия мамлакатга қарши янги санкциялар қўллаган, хусусан «Аэрофлот» компаниясининг қироллик ҳудудига парвозларини тақиқлаган. 25 февраль куни Канада Путиннинг атрофидагилар, депутатлар ва Россиянинг 27 та молиявий институтига қарши санкциялар киритди, Украина банкларига Россия ва Беларусь рублларида операциялар ўтказиш тақиқланди. Шунингдек, АҚШ Путин, Лавров ва Шойгуга қарши санкциялар эълон қилди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)