Россиянинг Польша ҳамда Ирландиядаги элчихоналарига ҳужумлар уюштирилди. Бу ҳақда дипломатик ваколатхоналарнинг матбуот хизматларига таяниб, «ТАСС» ва «РИА Новости» хабар қилди.
Варшавадаги элчихона пресс-атташеси Владимир Александров элчихона ходимлари доимий равишда турли таҳдидларга учраб келганини қайд этган.
«Бугун маҳаллий вақт билан 05:30 да (Тошкент вақтида билан 09:30) безори гуруҳлар дипломатик ваколатхонамизнинг асосий кириш дарвозаси «Россия Федерацияси элчихонаси» ёзувини бўяб кетган. Шунингдек, элчихонанинг орқа эшиги томонидан бинога чўзма (рогатка)дан металл шарчалар отилган, оқибатда турар жой биноларининг учта дераза ойнаси синган», — деган Александров.
Дублиндаги Россия элчихонаси вакили ҳам дипломатик миссия биносига ҳужум қилингани ҳақида хабар берган. Унинг сўзларига кўра, элчихона биноси ёнида уч кундан буён норозилик намойишлари ўтказилмоқда.
«Кечаги норозилик намойиши вақтида акция иштирокчилари полиция борлигига қарамай, Россия давлат гербини йиртиб ташлади ва маслаҳатчи элчининг машинасига ҳужум қилди», — деган у.
Дублиндаги дипломат 24 февраль куни намойишчилар элчихона биносидаги гербни қизил рангли бўёқ билан бежаб кетганини ҳам тасдиқлади.
Россия армиясининг Украинага қилган ҳужумидан кейин бутун дунёда, шунингдек, Россиянинг йирик шаҳарларида норозилик намойишлари ўтказилган. Москвада шаҳар ички ишлар бошқармасининг ахборотига кўра норозилик намойишлари вақтида 600 нафар одам ҳибсга олинган. Россия пойтахтида Пушкин майдонидаги намойишчиларнинг кўпчилиги полиция томонидан қамоққа ташланган. Санкт-Петербург, Екатеринбург, Новосибирскда ва бошқа шаҳарларда ҳам намойишлар бўлиб ўтган.
Изоҳ (0)