Putin Ukraina harbiylaridan mamlakatda hukumatni o‘z qo‘llariga olishni so‘radi

Rossiya prezidenti Vladimir Putin Ukraina Qurolli kuchlarining harbiylariga murojaat qilib, ulardan Kiyevdagi hukumatni o‘z qo‘llariga olishni so‘radi. Putin bu haqda Rossiya Xavfsizlik kengashining favqulodda majlisida gapirgan.

“Yana bir marta Ukraina Qurolli kuchlarining harbiylariga murojaat qilaman: neonatsistlar va millatchilarning farzandlaringizdan g‘araz maqsadlari yo‘lida foydalanishiga, ayollar va keksalardan tirik qalqon sifatida ishlatishlariga yo‘l qo‘ymang, hukumatni o‘z qo‘lingizga oling. Kiyevga joylashib olgan, Ukraina xalqini garovda ushlab turgan giyohvandlar va neonatsistlar to‘dasidan ko‘ra siz bilan kelishishimiz ancha oson kechadi”, — degan u.

Shuningdek, Putin rossiyalik ofitserlarning Ukrainada mardonavor, professional va qahramonlarcha harakat qilayotganini ta’kidlagan.

24-fevralda Putin Donbassda sakkiz yil davomida xo‘rlanib kelgan, Kiyev rejimi tomonidan ayovsiz munosabatda bo‘lingan odamlarni qutqarish maqsadida Donbassda maxsus harbiy operatsiyalar o‘tkazilishini ma’lum qildi. Rossiyaning Ukraina hududini demilitarizatsiya va denatsifikatsiya qilishini bildirdi. Putin 24-fevraldagi murojaatida ham Ukraina harbiylaridan qurollarni topshirish va uyga qaytishni so‘ragan, shuningdek, ularning jangovar harakatlar hududini sog‘-omon tark etish imkoni berilishini va’da qilgan.

Zelenskiy harbiy operatsiyalar boshlanganidan keyin Ukrainaning ozodlikni bermasligi, Rossiya bilan diplomatik munosabatlar to‘xtatilganini e’lon qildi. 25-fevralda esa ukrainaliklarning vatanni hech kimning ko‘magisiz yolg‘iz himoya qilayotgani, dunyoning yetakchi kuchlari esa vaziyatni tomoshabin sifatida kuzatayotgani haqida gapirgan.

Zelenskiyning so‘zlariga ko‘ra Yevropa hanuzgacha Ukrainaning NATOga a’zo bo‘lishi borasidagi savollarga javob berishga qo‘rqmoqda. Ukraina prezidenti Kiyev Moskva bilan betaraf maqom va xavfsizlik kafolatlari borasida gaplashishdan qo‘rqmasligini bildirgan. Kreml Zelenskiyning bayonoti yangi ekanligi va uni tahlil qilish zarurligi haqida izoh bergan. Keyinchalik Rossiya prezidentining matbuot kotibi Dmitriy Peskov Putinning Minskka Ukraina bilan muzokaralar olib borish uchun tashqi ishlar vazirligi, mudofaa vazirligi va prezident administratsiyasi vakillaridan iborat delegatsiya yuborishga tayyorligini ma’lum qildi. Rossiya TIV rahbari Sergey Lavrov esa Zelenskiyning betaraflik maqomi haqidagi gaplari yolg‘on deb hisoblashini aytdi.