Qozog‘iston prezidentining farmoni bilan Korrupsiyaga qarshi kurash agentligining sobiq rahbari Marat Axmetjanov respublika ichki ishlar vaziri etib tayinlandi. Bu haqda davlat rahbarining matbuot xizmatiga tayanib, “Interfaks” xabar berdi.
“Axmetjanov Marat Muratovich Qozog‘iston Respublikasi Korrupsiyaga qarshi kurash agentligi raisi lavozimidan ozod etilib, Qozog‘iston Respublikasi ichki ishlar vaziri etib tayinlansin”, — deyiladi farmonda. 25-fevral kuni respublika ichki ishlar vaziri lavozimida ishlab kelgan Yerlan Turg‘unboyev vazifasidan ozod qilinib, prezident maslahatchisi etib tayinlangan. 59 yoshli Turg‘unboyev 2019-yilning fevralidan beri Qozog‘iston ichki ishlar vaziri lavozimida ishlab kelayotgan edi.
Axmetjanov esa Korrupsiyaga qarshi kurash agentligini 2021-yilning bahoridan buyon boshqarib kelardi. 2016—2021-yillarda u Respublika Bosh prokurorining o‘rinbosari bo‘lgan. Shuningdek, To‘qayev Aset Isekeshevni prezident yordamchisi etib tayinladi. U avval prezident yordamchisi — Xavfsizlik kengashi kotibi lavozimida ishlardi.
Endilikda uning o‘rnini Bosh prokuror lavozimida ishlab kelayotgan Gizat Nurdauletov egalladi.
Bundan tashqari Qosim-Jo‘mart To‘qayev Bolat Tlepovni Prezident Administratsiyasi ichki siyosat bo‘limi mudiri etib tayinladi. Avval Tlepov Axborot va ijtimoiy rivojlanish vaziri o‘rinbosari lavozimida ishlab kelgan.
Avvalroq To‘qayev Olmaota hokimini lavozimidan bo‘shatgan edi.
Mavzuga doir:
- To‘qayev Darig‘a Nazarboyevaning qudasini Markaziy saylov komissiyasi rahbarligidan bo‘shatdi
- Qozog‘istonda sobiq mudofaa vaziri hibsga olindi. U yanvardagi tartibsizliklarda xizmat vazifasini bajarmaganlikda gumonlanmoqda
- Qozog‘istondagi namoyishlardan so‘ng Nazarboyevning uchinchi kuyovi ham iste’foga chiqdi
Izoh (0)