Путин Украина ҳарбийларидан мамлакатда ҳукуматни ўз қўлларига олишни сўради

Россия президенти Владимир Путин Украина Қуролли кучларининг ҳарбийларига мурожаат қилиб, улардан Киевдаги ҳукуматни ўз қўлларига олишни сўради. Путин бу ҳақда Россия Хавфсизлик кенгашининг фавқулодда мажлисида гапирган.

«Яна бир марта Украина Қуролли кучларининг ҳарбийларига мурожаат қиламан: неонацистлар ва миллатчиларнинг фарзандларингиздан ғараз мақсадлари йўлида фойдаланишига, аёллар ва кексалардан тирик қалқон сифатида ишлатишларига йўл қўйманг, ҳукуматни ўз қўлингизга олинг. Киевга жойлашиб олган, Украина халқини гаровда ушлаб турган гиёҳвандлар ва неонацистлар тўдасидан кўра сиз билан келишишимиз анча осон кечади», — деган у.

Шунингдек, Путин россиялик офицерларнинг Украинада мардонавор, профессионал ва қаҳрамонларча ҳаракат қилаётганини таъкидлаган.

24 февралда Путин Донбассда саккиз йил давомида хўрланиб келган, Киев режими томонидан аёвсиз муносабатда бўлинган одамларни қутқариш мақсадида Донбассда махсус ҳарбий операциялар ўтказилишини маълум қилди. Россиянинг Украина ҳудудини демилитаризация ва денацификация қилишини билдирди. Путин 24 февралдаги мурожаатида ҳам Украина ҳарбийларидан қуролларни топшириш ва уйга қайтишни сўраган, шунингдек, уларнинг жанговар ҳаракатлар ҳудудини соғ-омон тарк этиш имкони берилишини ваъда қилган.

Зеленский ҳарбий операциялар бошланганидан кейин Украинанинг озодликни бермаслиги, Россия билан дипломатик муносабатлар тўхтатилганини эълон қилди. 25 февралда эса украиналикларнинг ватанни ҳеч кимнинг кўмагисиз ёлғиз ҳимоя қилаётгани, дунёнинг етакчи кучлари эса вазиятни томошабин сифатида кузатаётгани ҳақида гапирган.

Зеленскийнинг сўзларига кўра Европа ҳанузгача Украинанинг НАТОга аъзо бўлиши борасидаги саволларга жавоб беришга қўрқмоқда. Украина президенти Киев Москва билан бетараф мақом ва хавфсизлик кафолатлари борасида гаплашишдан қўрқмаслигини билдирган. Кремль Зеленскийнинг баёноти янги эканлиги ва уни таҳлил қилиш зарурлиги ҳақида изоҳ берган. Кейинчалик Россия президентининг матбуот котиби Дмитрий Песков Путиннинг Минскка Украина билан музокаралар олиб бориш учун ташқи ишлар вазирлиги, мудофаа вазирлиги ва президент администрацияси вакилларидан иборат делегация юборишга тайёрлигини маълум қилди. Россия ТИВ раҳбари Сергей Лавров эса Зеленскийнинг бетарафлик мақоми ҳақидаги гаплари ёлғон деб ҳисоблашини айтди.