Avvalroq Rossiyaning “Sovkombank” “O‘zagroeksportbank”ni 4 mln dollarga sotib olgani haqida xabar berilgandi.
Kelishuvdan ikki kun o‘tib, 25-fevral kuni AQSh Moliya vazirligi mazkur bankka qarshi sanksiyalar e’lon qilganini ma’lum qildi.
Qanday sanksiyalar?
AQSh Moliya vazirligi “Sovkombank”ga cheklovlar qo‘yuvchi sanksiyalarni (SDN — Specially Designated Nationals and Blocked Persons) qo‘lladi .
Bu maksimal ehtimoliy cheklovlar AQSh yurisdiksiyasidagi bank aktivlarining bloklanishini, dollar transaksiyalari va AQSh kontragentlari bilan amalga oshiriladigan har qanday transaksiyalar o‘tkazilishining taqiqlanishini bildiradi.
Sanksiyalar nafaqat bankning o‘ziga, balki “Sovkombank”ning bevosita yoki bilvosita 50 yoki undan yuqori foiziga egalik qiladigan kompaniyalarga ham tegishlidir.
AQSh Moliya vazirligi, ushbu sanksiyalar moliyaviy xizmatlardagi Rossiya sektorini hali ancha vaqt cheklashi va jahon bozoriga kirish, investitsiyalarni jalb qilish va AQSh dollaridan foydalanish kabi Rossiya iqtisodiy sektoridagi boshqa qator muhim imkoniyatlarni sezilarli ravishda qisqartiradi deb hisoblaydi.
“Mazkur sanksiyalar AQSh moliya tizimiga aloqador bo‘lgan institutlarning har qanday aktivlarini muzlatadi va amerikaliklarga ular bilan ishlashni taqiqlaydi”, – deyiladi bayonotda.
Bankda nima deyishyapti?
“Sovkombank” sanksiya ro‘yxatiga kiritilgani haqida izoh berdi hamda kapital va likvidlik bo‘yicha zahiralarga ega ekanini ma’lum qildi.
Biroq Rossiya banki bir necha operatsiyalarni cheklashga majbur. Masalan, valyutalarni almashtirish, na bank ofislarida, na bankning mobil ilovlarida amalga oshirilishi mumkin.
Bundan tashqari, valyuta o‘tkazmalarini bankning mobil ilovasi va kredit tashkiloti bo‘limlari orqali chetga jo‘natib bo‘lmaydi.
Bank kartasidan, shu jumladan, Visa va Mastercard to‘lov tizimlaridan xorijda turib foydalanish va “Sovkombank” kartalari orqali to‘lovlarni chet elda amalga oshirishning endi iloji yo‘q.
Shuningdek, “Sovkombank” Rossiyaning eng yirik moliya institutlariga qarshi sanksiyalar qo‘llanilishi mumkin bo‘lgan vaziyatni oldindan o‘rganib chiqqanini, bu jarayonda u Markaziy bank va Moliya vazirligi bilan yaqindan hamkorlik qilganini aytdi.
Avvalroq Ukraina banklariga Rossiya va Belarus rubllarida operatsiyalar o‘tkazish taqiqlangani haqida xabar berilgandi.
Izoh (0)