Аввалроқ Россиянинг «Совкомбанк» «Ўзагроэкспортбанк»ни 4 млн долларга сотиб олгани ҳақида хабар берилганди.
Келишувдан икки кун ўтиб, 25 февраль куни АҚШ Молия вазирлиги мазкур банкка қарши санкциялар эълон қилганини маълум қилди.
Қандай санкциялар?
АҚШ Молия вазирлиги «Совкомбанк»га чекловлар қўювчи санкцияларни (SDN — Specially Designated Nationals and Blocked Persons) қўллади .
Бу максимал эҳтимолий чекловлар АҚШ юрисдикциясидаги банк активларининг блокланишини, доллар трансакциялари ва АҚШ контрагентлари билан амалга ошириладиган ҳар қандай трансакциялар ўтказилишининг тақиқланишини билдиради.
Санкциялар нафақат банкнинг ўзига, балки «Совкомбанк»нинг бевосита ёки билвосита 50 ёки ундан юқори фоизига эгалик қиладиган компанияларга ҳам тегишлидир.
АҚШ Молия вазирлиги, ушбу санкциялар молиявий хизматлардаги Россия секторини ҳали анча вақт чеклаши ва жаҳон бозорига кириш, инвестицияларни жалб қилиш ва АҚШ долларидан фойдаланиш каби Россия иқтисодий секторидаги бошқа қатор муҳим имкониятларни сезиларли равишда қисқартиради деб ҳисоблайди.
«Мазкур санкциялар АҚШ молия тизимига алоқадор бўлган институтларнинг ҳар қандай активларини музлатади ва америкаликларга улар билан ишлашни тақиқлайди», – дейилади баёнотда.
Банкда нима дейишяпти?
«Совкомбанк» санкция рўйхатига киритилгани ҳақида изоҳ берди ҳамда капитал ва ликвидлик бўйича заҳираларга эга эканини маълум қилди.
Бироқ Россия банки бир неча операцияларни чеклашга мажбур. Масалан, валюталарни алмаштириш, на банк офисларида, на банкнинг мобил иловларида амалга оширилиши мумкин.
Бундан ташқари, валюта ўтказмаларини банкнинг мобил иловаси ва кредит ташкилоти бўлимлари орқали четга жўнатиб бўлмайди.
Банк картасидан, шу жумладан, Visa ва Mastercard тўлов тизимларидан хорижда туриб фойдаланиш ва «Совкомбанк» карталари орқали тўловларни чет элда амалга оширишнинг энди иложи йўқ.
Шунингдек, «Совкомбанк» Россиянинг энг йирик молия институтларига қарши санкциялар қўлланилиши мумкин бўлган вазиятни олдиндан ўрганиб чиққанини, бу жараёнда у Марказий банк ва Молия вазирлиги билан яқиндан ҳамкорлик қилганини айтди.
Аввалроқ Украина банкларига Россия ва Беларусь рублларида операциялар ўтказиш тақиқлангани ҳақида хабар берилганди.
Изоҳ (0)