Тошкентда Европа Иттифоқи ва Марказий Осиё давлатларининг махсус вакиллари Афғонистондаги вазиятни муҳокама қилди

23 февраль куни Тошкент шаҳрида Европа Иттифоқи ва Марказий Осиё мамлакатларининг Афғонистон бўйича махсус вакиллари конференцияси бўлиб ўтди. Бу ҳақда Ўзбекистон Ташқи ишлар вазирлиги матбуот хизмати хабар берди.

Тадбирда афғон инқирозини тинч йўл билан ҳал этиш, Афғонистонни минтақавий интеграция жараёнларига фаол жалб этиш, мамлакат иқтисодиётини тиклаш ва унинг ҳудудида турли инфратузилма лойиҳаларини амалга ошириш бўйича халқаро ҳамда минтақавий саъй-ҳаракатлар муҳокама қилинган.

Ўзбекистон президентининг Афғонистон бўйича махсус вакили Исматулла Иргашев ўз нутқида мамлакатнинг Афғонистонга нисбатан юритаётган сиёсати, унинг асосий жиҳатлари, жумладан, мамлакат янги ҳукумати билан конструктив мулоқот ўрнатиш зарурлигига алоҳида тўхталиб ўтган.

Учрашув иштирокчилари Афғонистондаги оғир инсонпарварлик вазиятдан хавотирда эканликларини қайд этиб, бошқа давлатларни ҳам ушбу мамлакат халқига мазкур хайрли ишга қўл уришларига чорлаган.

«Афғонистоннинг янги расмийлари кенг вакилликка асосланган ҳукумат тузиш бўйича ўз ваъдалари ва халқаро мажбуриятларини бажариши, аёллар ва миллий озчиликлар ҳуқуқларини ҳурмат қилиши, шунингдек, мамлакат ҳудудининг халқаро террорчилар бошпанасига айланишининг олдини олиши зарурлиги таъкидланди», — дейилади хабарда.

Тадбирда иштирок этган махсус вакиллар президенти Шавкат Мирзиёевнинг Термиз шаҳрида Афғонистонга инсонпарварлик ёрдами етказиб бериш учун Кўптармоқли транспорт-логистика хабини ташкил этиш ташаббусини қўллаб-қувватлашини билдирган.

Ушбу шаклдаги мулоқотни Афғонистон халқини қўллаб-қувватлаш бўйича маслаҳатлашувлар ва ҳамкорлик платформаси сифатида мунтазам равишда давом эттиришга келишиб олинган. Тадбир якуни бўйича қўшма баёнот қабул қилинган.

Аввалроқ Кобул шаҳрида Ўзбекистон ва Афғонистон делегацияларининг кенгайтирилган йиғилиши бўлиб ўтгани тўғрисида хабар берилганди. Ўзбекистон томонига бош вазирнинг ўринбосари — инвестициялар ва ташқи савдо вазири Сардор Умурзоқов, Афғонистон томонига эса муваққат ҳукумати раҳбарининг ўринбосари Абдулғани Бародар бошчилик қилган. Учрашувда афғон томони мамлакатда хавфсизликни таъминлаш, иқтисодиёт ва ижтимоий соҳани тиклаш ҳамда коррупцияга қарши курашиш борасида кўрилаётган чора-тадбирлар ҳақида маълумот берган.