Ijtimoiy tarmoqlarda tibbiyot fanlari doktori Zarifboy Ibodullayevning 19-fevral kuni O‘zbekiston ilm-fani tobora jar yoqasiga yaqinlashib borayotgani aytilgan, o‘zbek olimlari va ilmiy jamoatchilikka murojaati aks etgan videolavha tarqaldi. Innovatsion rivojlanish vazirligi shu munosabat bilan bayonot berdi.
Bayonotda aytilishicha, o‘tgan besh yil mobaynida O‘zbekiston ilmiy-innovatsion faoliyati boshqa sohalar kabi isloh qilingan. “Ilm-fan va ilmiy faoliyat to‘g‘risida”gi va “Innovatsion faoliyat to‘g‘risida”gi qonunlar qabul qilinib, 2019–2021-yillarda O‘zbekiston Respublikasini innovatsion rivojlantirish strategiyasi, Ilm-fanni 2030-yilgacha rivojlantirish konsepsiyasi ishlab chiqilgan va ularda belgilangan vazifalar amalga oshirilmoqda.
Vazirlik, shuningdek, fan doktori ilmiy darajasiga ega bo‘lgan oliy o‘quv muassasalari va ilmiy tadqiqot institutlari xodimlarining bazaviy lavozim maoshlari 2016-yilga nisbatan 3,2 barobarga oshirilganini qayd etgan.
2017-yilning 1-iyulidan falsafa doktorlari (PhD) va fan doktorlari (DSc)ni tayyorlash bo‘yicha oliy o‘quv yurtidan keyingi ta’limning ikki bosqichli tizimi joriy etilganidan keyin ilmiy va ilmiy-pedagogik kadrlarni tayyorlashga kvotalar soni barqaror ravishda ortib bormoqda. Hozirda 2020-yilga nisbatan doktoranturaga ajratilgan kvotalar soni qariyb 5 barobarga oshgan.
“Innovatsion texnologiyalarni mamlakat iqtisodiyotiga faol joriy etish uchun texnologiyalarni transfer qilish amaliyoti qo‘llanilmoqda. Ilm-fan va innovatsiyalarga sarf-xarajatlar 2017-yildan buyon sezilarli darajada oshdi. Ilmiy va innovatsion faoliyat bo‘yicha dastur va loyihalarni amalga oshirish uchun davlat budjetidan jami 1,488,3 milliard so‘m (2018-yilda – 198 milliard so‘m, 2019-yilda – 347,7 milliard so‘m, 2020-yilda – 428,6 milliard so‘m, 2021-yilda – 514 milliard so‘m) ajratildi. Yosh avlod orasida ilm-fanga qiziqish ortib bormoqda”, — deyiladi xabarda.
Bayonotda, shuningdek, hozirgi kunda respublikada 144 ta oliy o‘quv muassasasi mavjud ekani, oliy ta’lim va mutaxassislik yo‘nalishlari klassifikatori 329 ta ta’lim yo‘nalishi va 582 ta magistratura mutaxassisligini o‘z ichiga olishi aytilgan.
Vazirlik olimning maqolalar chop etilishi jarayoni bo‘yicha fikrlariga to‘xtalib o‘tgan. Aytilishicha, shubhali jurnallarda maqola chop etish muammosi ham poytaxt, ham viloyat ilmiy va ta’lim muassasalariga xos hisoblanadi. Bu fakt mazkur yo‘nalishdagi institutlarning tavsiya etilgan nashriyotlar bilan ishlashni tashkil etish vositalari va mexanizmlari haqida past darajada xabardorligini ko‘rsatishi aytilgan.
Bayonotda vazirlik sohadagi yana ko‘plab natijalarni keltirib o‘tib, Zarifboy Ibodullayevning “O‘zbekiston ilm-fani tobora jar yoqasiga yaqinlashmoqda” degan fikri haqiqatga to‘g‘ri kelmasligi ma’lum qilgan.
Eslatib o‘tamiz, iyul oyida Asab va ruhiyat ilmiy-tibbiy markazi direktori, professor Zarifboy Ibodullayevning O‘zbekistonda amalga oshirilayotgan ommaviy vaksinatsiya jarayonlarida qo‘llanilayotgan O‘zbekiston—Xitoy hammuallifligida yaratilgan ZF-UZ-VAC 2001 vaksinasining yaratilish bosqichlari haqida ma’lumotlar yo‘qligini aytib, ushbu vaksina qo‘llanilishining maqsadga muvofiqligini shubha ostiga olgan savollari bilan ijtimoiy tarmoqlarda videomurojaati tarqalgan edi.
Bunga javoban Innovatsion rivojlanish vazirligi bayonot bergan. Unda Ibodullayevning e’tirozlari noo‘rin va haqiqatga umuman to‘g‘ri kelmasligi, u tomonidan tarqatilgan videomateriallar O‘zbekistonda amalga oshirilayotgan ommaviy vaksinatsiya jarayonlarida aholini chalg‘itishga xizmat qilayotgani aytilgan. “Professor Ibodullayev ilmiy jurnallardagi ma’lumotlarni o‘rganmay, mazkur vaksina haqida hech qayerda ma’lumotlar berilmagan, deb xalqimizning ko‘ngliga g‘ulg‘ula solmoqda”, deyilgan vazirlik bayonotida.
Izoh (0)