O‘zbekiston yo‘llarida: Toshkentda Spark uy devoriga urildi, Andijonda Malibu va Kia to‘qnashdi

So‘nggi kunlarda sodir bo‘lgan yo‘l-transport hodisalari tafsilotlarini taqdim etamiz.

Toshkentda Spark uy devoriga urildi

2022-yil 21-fevral kuni soat 18:17 da 102 tizimidan tushgan xabarga ko‘ra, shu kuni soat 16:00 larda Mirzo Ulug‘bek tumani Geofizika ko‘chasida haydovchi Q.A. (1990-yilda tug‘ilgan) Spark transport vositasini boshqarib ketayotib, “Alisherobod” MFY qarshisida rul boshqaruvini yo‘qotib, uyning devoriga urilgan.

To‘qnashuv oqibatida haydovchi chap boldir ikkala suyaklari o‘rta uchligidan yopiq sinib, maydalanib siljigani, o‘ng qo‘l 5 kaft sohasida kesilgan jarohati, tanasidan ko‘plab shilingan jarohatlar tashxisi bilan shifoxonaga murojaat qilgan.

Mazkur holat yuzasidan Toshkent shahar IIBB YHXB tomonidan surishtiruv harakatlari o‘tkazilmoqda.

Farg‘onada Lacetti piyoda hayotiga zomin bo‘ldi

21-fevral kuni haydovchi H.A. “Satkak” MFY hududidan o‘tgan 4R-112 Farg‘ona–Hamzaobod yo‘lining 228-kilometrida Lacetti rusumli mashinasini boshqarib ketayotib, yo‘lning belgilanmagan joyidan chiqib qolgan piyoda Q.M.ni urib yuborgan.

Oqibatda piyoda Q.M. shifoxonada vafot etgan.

Mazkur holat yuzasidan Farg‘ona tumani IIB huzuridagi tergov bo‘limi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish qoidalarini buzish) bilan jinoyat ishi qo‘zg‘atilib, tergov harakatlari davom etmoqda.

Andijonda Malibu va Kia to‘qnashdi

23-fevral soat 09:35lar chamasida Asaka tumani “Yangisor” MFY hududida YTH sodir bo‘lgan. Fuqaro A.U. (1993-yilda tug‘ilgan) o‘zining boshqaruvida bo‘lgan Malibu avtomashinasining oldida harakatlanayotgan fuqaro Sh.A. (1991-yilda tug‘ilgan) boshqaruvidagi Kia Bongo rusumli avtotransport vositasiga oraliq masofani saqlamasdan orqa qismiga borib urilishi oqibatida to‘qnashuv sodir etgan.

To‘qnashuv oqibatida avtomashinalar texnik shikastlangan. Haydovchilarga va boshqa yo‘l harakati qatnashchilariga hech qanday zarar yetmagan.

Andijon viloyati IIB YHXB rahbariyati tomonidan voqea joyi borib o‘rganilib, Asaka tumani IIB YHXB mas’ullariga qo‘shimcha yo‘l belgilari o‘rnatish va transport vositalari tezligini pasaytirish uchun sun’iy notekisliklar tashkil etish bo‘yicha topshiriqlar berildi.