Turkiyaning Hitit Sosyal Tesisler Sağlık İnşaat Ticaret Limited shirkati Farg‘ona shahrida tibbiyot shaharchasini quradi. Bu haqda Xayrullo Bozorov boshchiligidagi Farg‘ona viloyati delegatsiyasining Turkiyaga tashrifi davomida ma’lum qilindi, deb xabar bermoqda “Daryo” muxbiri.
Viloyat hokimligi axborot xizmatining ma’lum qilishicha, delegatsiyaning Turkiyaga tashrifi doirasida umumiy qiymati 142 million dollardan ziyod bo‘lgan 12 ta investitsion kelishuv hamda eksport shartnomasi imzolangan.
Delegatsiya a’zolari Bursada Tijorat va sanoat palatasi, BEKSİAD bolalar tayyor kiyimlar ishlab chiqaruvchilari va ishbilarmonlari jamiyati, Uludag‘ meva-sabzavot mahsulotlari eksportchilari uyushmasi hamda Istanbulda Turkiya Tashqi iqtisodiy aloqalar kengashida biznes uchrashuvlar o‘tkazgan.
Jumladan, Hitit Sosyal Tesisler Sağlık İnşaat Ticaret Limited shirkati bilan Farg‘ona shahrida tibbiyot shaharchasi qurish bo‘yicha 36 million dollarlik, BENEKS kompaniyaci bilan Furqat tumanida yirik trikotaj mahsulotlari ishlab chiqarish majmuasi barpo etish bo‘yicha 35 million dollarlik kelishuvlar imzolangan.
Shuningdek, BTC Yapı A.Ş kompaniyasi tomonidan Farg‘ona shahrida qurilish mahsulotlari hamda eshik-romlar ishlab chiqarish korxonalari hamda Ekoshaharda ko‘p qavatli uylar barpo etishni o‘z ichiga olgan 25 million dollarlik shartnoma tuzilgan.
Bundan tashqari, Bursadagi Baktat kompaniyalar guruhi bilan Farg‘ona va So‘x tumanlarida malinachilik klasterini, Quva tumanida esa biokimyoviy o‘g‘itlar va meva sabzavotni qayta ishlash korxonasini tashkil etish bo‘yicha umumiy qiymati 7 million dollar bo‘lgan loyihani amalga oshirishi bo‘yicha kelishuvga erishilgan.
Izoh (0)