“Borussiya D” Yevropa Ligasidan chiqib ketsa, Erling Holand o‘z kelajagiga oydinlik kiritish uchun Mino Rayola bilan uchrashadi

“Borussiya D” hujumchisi Erling Holandga Yevropaning beshta yetakchi klublaridan taklif bor.

Agarda “Borussiya” Yevropa Ligasidan chiqib ketsa, 25-fevral kuni hujumchi agenti Mino Rayola bilan kelajagini muhokama qilish uchun uchrashadi.

Norvegiyalik futbolchiga “Manchester Siti”, “Real”, “Barselona”, “Bavariya” va “PSJ”dan takliflar bor.

Bundan tashqari, dortmundliklar ham hujumchiga maoshi yaxshilangan shartnoma taklif qilmoqchi. Ammo Holand bu variantga to‘xtalmoqchi emas.

Cadena SER xabariga ko‘ra, Erling uchun kurashda “Manchester Siti” favorit, ammo madridliklar keyingi yilga uni erkin agent sifatida o‘z safiga qo‘shib olish uchun yana bir mavsum “Borussiya”da qolishga ko‘ndirmoqchi.

Avvalroq, “Real” Erling Holand bilan dastlabki kelishuvga erishgani, bu kelishuvdan keyin Holandning vakillari boshqa klublar bilan muzokara olib borolmasligi xabar qilingandi. “Barselona” esa hujumchini klubning eng ko‘p maosh oluvchi futbolchisiga aylantirmoqchi haqida ma’lumot berilgandi.

“Borussiya D” 24-fevral kuni Yevropa Ligasining 1/8 finaliga o‘tish o‘yinida “Reynjers”ga qarshi maydonga tushadi. Birinchi o‘yinda nemis jamoasi o‘z uyida 2:4 hisobida mag‘lub bo‘lgandi.