UEFA 25-fevral kuni Ukraina va Rossiya o‘rtasidagi urush tufayli Ijroqo‘mning navbatdan tashqari majlisini o‘tkazadi. Bu haqida tashkilot o‘z Twitter sahifasida ma’lum qildi.
Majlis Toshkent vaqti bilan 14:00 da boshlanadi. “Ijroiya qo‘mitasi a’zolari vaziyatni baholaydi va barcha zarur qarorlarni qabul qiladi”, — deyiladi bayonotda.
Associated Press’ning xabar qilishicha, UEFA Chempionlar Ligasi 2021/22-yilgi mavsumi finalini Sankt-Peterburgdan olib qo‘yish qaroriga kelgan va bu haqda 25-fevral kungi majlisda e’lon qiladi.
ESPN xabariga ko‘ra, UEFA finali mezbonligini Rim, Myunxen, Parij, Amsterdam yoki Barselona shaharlaridan biriga berishi mumkin.
Avvalroq Yevroparlament deputatlari UEFAni Sankt-Peterburgda bo‘lib o‘tishi rejalashtirilgan Chempionlar Ligasi finalini Rossiyadan olib qo‘yishga chaqirgandi. Ayrim siyosatchilar esa rossiyaliklarni, xususan, rossiyalik sportchilarni vizadan mahrum qilish kerakligini aytmoqda.
Chempionlar Ligasi finali 28-may kuni “Gasprom Arena”da bo‘lib o‘tishi rejalashtirilgandi.
24-fevral kuni Putin Donbassda “maxsus harbiy operatsiya” boshlanganini e’lon qildi. Ayni vaqtda Ukrainaning qator hududlarida harbiy harakatlar davom etmoqda.
Izoh (0)