«Боруссия Д» Европа Лигасидан чиқиб кетса, Эрлинг Ҳоланд ўз келажагига ойдинлик киритиш учун Мино Райола билан учрашади

«Боруссия Д» ҳужумчиси Эрлинг Ҳоландга Европанинг бешта етакчи клубларидан таклиф бор.

Агарда «Боруссия» Европа Лигасидан чиқиб кетса, 25 февраль куни ҳужумчи агенти Мино Райола билан келажагини муҳокама қилиш учун учрашади.

Норвегиялик футболчига «Манчестер Сити», «Реал», «Барселона», «Бавария» ва «ПСЖ»дан таклифлар бор.

Бундан ташқари, дортмундликлар ҳам ҳужумчига маоши яхшиланган шартнома таклиф қилмоқчи. Аммо Ҳоланд бу вариантга тўхталмоқчи эмас.

Cadena SER хабарига кўра, Эрлинг учун курашда «Манчестер Сити» фаворит, аммо мадридликлар кейинги йилга уни эркин агент сифатида ўз сафига қўшиб олиш учун яна бир мавсум «Боруссия»да қолишга кўндирмоқчи.

Аввалроқ, «Реал» Эрлинг Ҳоланд билан дастлабки келишувга эришгани, бу келишувдан кейин Ҳоланднинг вакиллари бошқа клублар билан музокара олиб боролмаслиги хабар қилинганди. «Барселона» эса ҳужумчини клубнинг энг кўп маош олувчи футболчисига айлантирмоқчи ҳақида маълумот берилганди.

«Боруссия Д» 24 февраль куни Европа Лигасининг 1/8 финалига ўтиш ўйинида «Рейнжерс»га қарши майдонга тушади. Биринчи ўйинда немис жамоаси ўз уйида 2:4 ҳисобида мағлуб бўлганди.