Туркиянинг Hitit Sosyal Tesisler Sağlık İnşaat Ticaret Limited ширкати Фарғона шаҳрида тиббиёт шаҳарчасини қуради. Бу ҳақда Хайрулло Бозоров бошчилигидаги Фарғона вилояти делегациясининг Туркияга ташрифи давомида маълум қилинди, деб хабар бермоқда «Дарё» мухбири.
Вилоят ҳокимлиги ахборот хизматининг маълум қилишича, делегациянинг Туркияга ташрифи доирасида умумий қиймати 142 миллион доллардан зиёд бўлган 12 та инвестицион келишув ҳамда экспорт шартномаси имзоланган.
Делегация аъзолари Бурсада Тижорат ва саноат палатаси, BEKSİAD болалар тайёр кийимлар ишлаб чиқарувчилари ва ишбилармонлари жамияти, Uludag‘ мева-сабзавот маҳсулотлари экспортчилари уюшмаси ҳамда Истанбулда Туркия Ташқи иқтисодий алоқалар кенгашида бизнес учрашувлар ўтказган.
Жумладан, Hitit Sosyal Tesisler Sağlık İnşaat Ticaret Limited ширкати билан Фарғона шаҳрида тиббиёт шаҳарчаси қуриш бўйича 36 миллион долларлик, BENEKS компанияcи билан Фурқат туманида йирик трикотаж маҳсулотлари ишлаб чиқариш мажмуаси барпо этиш бўйича 35 миллион долларлик келишувлар имзоланган.
Шунингдек, BTC Yapı A.Ş компанияси томонидан Фарғона шаҳрида қурилиш маҳсулотлари ҳамда эшик-ромлар ишлаб чиқариш корхоналари ҳамда Экошаҳарда кўп қаватли уйлар барпо этишни ўз ичига олган 25 миллион долларлик шартнома тузилган.
Бундан ташқари, Бурсадаги Baktat компаниялар гуруҳи билан Фарғона ва Сўх туманларида малиначилик кластерини, Қува туманида эса биокимёвий ўғитлар ва мева сабзавотни қайта ишлаш корхонасини ташкил этиш бўйича умумий қиймати 7 миллион доллар бўлган лойиҳани амалга ошириши бўйича келишувга эришилган.
Изоҳ (0)