O‘zbekiston mahalliy aholi va chet elliklarga Davlat qimmatli qog‘ozlarini (DQQ) sotib olishga ruxsat beradi. Bu haqda Moliya vazirligi axborot xizmati xabar bermoqda.
Bungacha bu turdagi qog‘ozlarni faqat o‘zbekistonlik banklar va yuridik shaxslar sotib olishlari mumkin edi.
Moliya vazirligi tomonidan 2018 yilda 3 ta auksionda 597,1 mlrd so‘m, 2019 yilda 15 ta auksionda 1 550 mlrd so‘m, 2020 yilda 22 ta auksionda 5 024 mlrd so‘mlik DQQ joylashtirilgan. Vazirlik o‘tgan yili 64 ta auksion o‘tkazib, muddati 10 yilgacha bo‘lgan 486,3 mlrd so‘mlik obligatsiyalarni sotgan.
Davlat qimmatli qog‘ozlari nima uchun kerak?
DQQ Moliya vazirligi tomonidan hujjatsiz shaklda chiqariladi va qimmatli qog‘ozlar bozorida muomalada bo‘ladi.
Davlat qimmatli qog‘ozlari — davlat budjeti taqchilligini qoplash va yirik davlat loyihalariga investitsiyalarni jalb qilish uchun foydalaniladigan moliyaviy vosita. Ushbu ishonchli aktiv moliya-kredit tashkilotlari balansining likvidligini ta’minlash uchun ishlatiladi.
Qimmatli qog‘ozlarni chiqarish orqali davlat valyuta kursiga ta’sir ko‘rsatishi, pul massasi va inflyatsiyani tartibga solishi, kapitalni bir moliyaviy segmentdan boshqasiga o‘tkazishi va boshqa muammolarni hal qilishi mumkin.
Izoh (0)