Yevropa ittifoq diplomatiyasi rahbari Jozep Borrel Moskvadan Donsetks hamda Lugansk Xalq Respublikalarining mustaqilligini tan olmaslikni so‘radi. Bu haqda “Interfaks” xabar bergan.
“Biz bu borada yakuniy qarorga kelinmaganidan kelib chiqib xulosa qilyapmiz. Prezident Putindan xalqaro huquq me’yorlarini hurmat qilishni va Minsk shartnomasiga rioya etishni, LXR hamda DXR mustaqilligini tan olmaslikni so‘raymiz”, – degan u.
Borrel Bryusselning Moskva ushbu ikki hududdagi respublikalar mustaqilligini tan olmasligiga ishonishini ta’kidlab o‘tgan.
Avval Rossiya Xavfsizlik kengashining favqulodda yig‘ilishida majlis ishtirokchilari Putinga Donbass va Lugansk Xalq Respublikalari mustaqilligini tan olishni taklif qilgan, bu boradagi farmon loyihasi tez orada imzolanishi kutilayotgandi.
20-fevralda NATO Kiyevdagi ofisini yopgani, Yevropaning bir qator aviakompaniyalari Ukrainaga parvozlarni to‘xtatgani, shuningdek, avvalroq Buyuk Britaniya Yevropa Ittifoqi va G7 bilan Rossiyaga qarshi sanksiyalarni kelishib olgani xabar qilingan. Keyinchalik Ukraina mudofaa vaziri Rossiyaga evakuatsiya qilingan Donbass aholisi o‘z uylariga qaytayotganini bildirgan.
Izoh (0)