Toshkent shahri Yashnobod tumanida fuqarolarga imtiyozli shartlar asosida mashina olib berishni va’da qilgan xususiy korxona rahbari qo‘lga olindi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Yashnobod tuman bo‘limi tomonidan fuqarolarning murojaatlariga asosan tergovga qadar tekshiruv o‘tkazilgan. Unda “E.T.A” xususiy korxonasi rahbari D.T. (muqaddam firibgarlik va boshqa jinoyatlari uchun sudlangan) va boshqalar fuqarolarning ishonchiga kirib, ularga imtiyozli shartlar asosida avtotransport vositalarini olib berishni va’da qilgani aniqlangan. Ular 72 nafar fuqaro bilan shartnoma tuzishga erishib, jami 362,3 million so‘mni MChJning hisob-raqamiga dastlabki to‘lov sifatida qabul qilib, ushbu mablag‘larni o‘zlarining ehtiyojlariga sarflab yuborgan. Shuningdek, D.T. soliq hisobotlarida daromadlarini kamaytirib ko‘rsatish orqali 137,7 million so‘m soliq to‘lovlarini to‘lashdan qasddan bo‘yin tovlagan.
Holat yuzasidan Jinoyat kodeksining 168-moddasi (firibgarlik) va 184-moddasi (soliqlar yoki boshqa majburiy to‘lovlarni to‘lashdan bo‘yin tovlash) bilan jinoyat ishi qo‘zg‘atilib, tergov harakatlari o‘tkazilmoqda.
Mavzuga doir:
- Toshkentda xorij kompaniyasiga tegishli 152 ming dollarlik yuk konteynerlarini qo‘lga kiritgan shaxslar aniqlandi
- Jizzaxda tadbirkorga 200 mln so‘m imtiyozli kredit olib berish uchun 600 dollar so‘ragan davlat soliq katta inspektori ushlandi
- Toshkent va Andijonda qisqa muddatda haydovchilik guvohnomasini olib berishni va’da qilgan shaxslar ushlandi
Izoh (0)