Тошкент шаҳри Яшнобод туманида фуқароларга имтиёзли шартлар асосида машина олиб беришни ваъда қилган хусусий корхона раҳбари қўлга олинди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Яшнобод туман бўлими томонидан фуқароларнинг мурожаатларига асосан терговга қадар текширув ўтказилган. Унда «Э.Т.А» хусусий корхонаси раҳбари Д.Т. (муқаддам фирибгарлик ва бошқа жиноятлари учун судланган) ва бошқалар фуқароларнинг ишончига кириб, уларга имтиёзли шартлар асосида автотранспорт воситаларини олиб беришни ваъда қилгани аниқланган. Улар 72 нафар фуқаро билан шартнома тузишга эришиб, жами 362,3 миллион сўмни МЧЖнинг ҳисоб-рақамига дастлабки тўлов сифатида қабул қилиб, ушбу маблағларни ўзларининг эҳтиёжларига сарфлаб юборган. Шунингдек, Д.Т. солиқ ҳисоботларида даромадларини камайтириб кўрсатиш орқали 137,7 миллион сўм солиқ тўловларини тўлашдан қасддан бўйин товлаган.
Ҳолат юзасидан Жиноят кодексининг 168-моддаси (фирибгарлик) ва 184-моддаси (солиқлар ёки бошқа мажбурий тўловларни тўлашдан бўйин товлаш) билан жиноят иши қўзғатилиб, тергов ҳаракатлари ўтказилмоқда.
Мавзуга доир:
- Тошкентда хориж компаниясига тегишли 152 минг долларлик юк контейнерларини қўлга киритган шахслар аниқланди
- Жиззахда тадбиркорга 200 млн сўм имтиёзли кредит олиб бериш учун 600 доллар сўраган давлат солиқ катта инспектори ушланди
- Тошкент ва Андижонда қисқа муддатда ҳайдовчилик гувоҳномасини олиб беришни ваъда қилган шахслар ушланди
Изоҳ (0)