Toshkent viloyati Ohangaron tumanidagi “Gulobod-meva” sabzavot, polizchilik va chorvachilik xo‘jaligi kimoshdi savdosiga qo‘yildi. Lot ma’lumotlari “E-auksion” portalida e’lon qilingan.
Lot izohida yozilishicha, 2010–2018-yillarda qurilgan 1 va 2 qavatli xo‘jalik 26 xonadan iborat. 1,94 gektar maydonda joylashgan kompleksning umumiy maydoni 19 421 kvadrat metrni tashkil etadi.
Xo‘jalikda gaz, suv, elektr ta’minoti va kanalizatsiya mavjud. Chorvachilik kompleksi bir necha turdagi tovar va moddiy boyliklar bilan savdoga qo‘yilmoqda.
Auksionga qo‘yilgan kompleksning boshlang‘ich bahosi — 62,02 mlrd so‘m. Arizalar 3-mart 09:00 ga qadar qabul qilinadi. Savdolar xuddi shu kuni 10:00 da boshlanadi.
Chorvachilik xo‘jaligi 17-fevraldagi auksionda sotilmagan edi. Shu sababli kimoshdi savdosi auksion talablariga asosan o‘tkazilmagan deb topilgan.
Avvalroq Toshkent shahrida 51 xonali hovli auksionga qo‘yilgani haqida xabar berilgan edi.
Izoh (0)