“O‘tgan yili 2, bu yil 4216” — UzAuto Motors 2022-yilni qanday boshladi?

O‘zbekistonda 2022-yilning yanvar oyida yengil avtomobil ishlab chiqarish o‘tgan yilning shu davriga nisbatan ikki barobarga oshdi. Bu haqda Davlat statistika qo‘mitasi hisobotida qayd etildi. 

Yanvar oyida eng ko‘p ishlab chiqarilgan avtomobil Lacetti-Gentra bo‘ldi — 4216 dona. 2021-yilning xuddi shu oyida bu turdagi ikki dona avtomobil ishlab chiqarilgan edi, undan oldingi yilda esa 5962 tani tashkil qilgan.

Cobalt avtomobillari bu yilning boshida 3393 dona ishlab chiqarilgan. O‘tgan yilda 101 dona bu turdagi avtomobil ishlab chiqarilgan bo‘lsa, 2020-yilda 5078 ta edi.

2022-yilning yanvar oyida 323 dona Spark avtomobili ishlab chiqarilgan. Bu o‘tgan yilning shu davriga nisbatan 284 taga ko‘p.

Shunday qilib, UzAuto Motors o‘tgan yilni inqiroz bilan boshlagan bo‘lsa, bu yilgi ko‘rsatkichlar 2020-yilgisiga deyarli yaqinlashib qoldi.

2021-yilda ishlab chiqarish pasayishining asosiy sababi sifatida butun jahonda bir necha yillardan beri yuz berayotgan mikrosxemalar tanqisligi ko‘rsatilmoqda.

Chiplar ta’minotidagi uzilishlar sabab bir qator avtokorxonalar faoliyati to‘xtatilib, natijada mikroprotsessorlar xaridi 2020-yilning boshidayoq maksimal darajada qisqargan edi.

Yetishmovchilik tufayli yarimo‘tkazgichlarni sotib olishda sezilarli darajadagi qator navbatlar yuzaga keldi. Ushbu navbatlar oxirida GM, Ford, Fiat Chrysler, Volkswagen, Renault, Subaru, Nissan, Honda va Mazda avtomobil ishlab chiqaruvchi korxonalar turardi.

Ko‘plab yirik avtokorxonalar milliardlab dollarlik ziyon ko‘rdi. GM kompaniyasi Amerikadagi ikkita fabrikasini yopishga ham ulgurdi, Koreyadagi ishlab chiqarish hajmini qisqartirdi va natijada taxmin qilinayotgan daromad hajmini pasaytirdi.

Aprel oyida Nvidia korporatsiyasining moliyaviy direktori Kolett Kress mikrosxemalar yetishmovchiligi yil oxirigacha kuzatilishini prognoz qilgandi.

Avvalroq avtotransport vositalarini davlat ro‘yxatidan o‘tkazishda ham jadal o‘sish kuzatilayotgani haqida xabar berilgan edi. 

Unga ko‘ra 2022-yil yanvar oyida 113,2 ming dona avtomobil davlat ro‘yxatidan o‘tkazildi.

Bu ko‘rsatkich o‘tgan yilning yanvariga nisbatan 126,4 foizga, 2020-yil yanvar oyiga nisbatan esa 138,4 foizga ko‘p. 2021-yilning dekabriga nisbatan o‘sish sur’ati 96,5 foizni tashkil etdi.