Бухоро вилояти Ғиждувон туманида пул эвазига ҳайдовчилик гувоҳномасини олиб беришни ваъда қилган автомактаб ўқитувчисига суд ҳукми ўқилди, деб хабар беради Олий суд матбуот хизмати.
Маълум бўлишича, Ф.А. исмли фуқаро ҳайдовчилик гувоҳномаси олиш мақсадида тумандаги «Миршод автомактаб» масъулияти чекланган жамиятида ўқитувчи вазифасида ишловчи А.Н. билан учрашган. У фуқаро Ф.А.дан Б, C тоифадаги ҳайдовчилик гувоҳномаси олиш учун имтиҳондан ўтказиш, тиббий маълумотнома олиб бериш ҳамда ҳайдовчилик курсида ўқиганлик тўғрисида ҳужжатларни тайёрлаб бериш эвазига 3 миллион сўм пул сўраган.
Ўқитувчи 3 миллион сўм пулни олган вақтда ҳуқуқни муҳофаза қилувчи идоралар вакиллари томонидан жиноят устида ушланган.
Мазкур ҳолат юзасидан ўтказилган суд мажлисида А.Н. Жиноят кодексининг 59-моддаси тартибида тайинланган жазоларни қисман қўшиш йўли билан узил-кесил 2 йил муддатга муайян ҳуқуқдан, яъни автомототранспорт воситалари ва шаҳар электр транспорт воситалари ҳайдовчиларини тайёрлаш, қайта тайёрлаш ҳамда уларнинг малакасини ошириш муассасаларида ишлаш ҳуқуқидан маҳрум қилинган. Унга ойлик иш ҳақининг 20 фоизини давлат даромадига ундириш шарти билан 3 йил муддатга ахлоқ тузатиш ишлари жазоси тайинланган.
Эслатиб ўтамиз, 2021 йилнинг декабрида Бухоро вилоятининг Ғиждувон туманида фуқарога ҳайдовчилик гувоҳномаси олиб бериш учун 3 миллион сўм пора олган автомактаб ўқитувчиси ушлангани ҳақида хабар берилган эди.
Мавзуга доир:
- Тошкент ва Андижонда қисқа муддатда ҳайдовчилик гувоҳномасини олиб беришни ваъда қилган шахслар ушланди
- Наманган ва Қорақалпоғистонда фуқароларга қисқа муддатда ҳайдовчилик гувоҳномаларини олиб беришни ваъда қилган шахслар ушланди
- Тошкентда 900 долларга «права»ни имтиҳонсиз олиб бермоқчи бўлган шахслар ушланди
- Самарқандда дарсларга қатнашмасдан, 20 кунда «права» олиб беришни ваъда қилган хусусий мактаб раҳбари ушланди
Изоҳ (0)