BMT Donbassda bo‘lgan barcha tomonlardan keskinlikning qurolli to‘qnashuvlarga ulanib ketishining oldini olish maqsadida shoshilinch qarorlar chiqarmaslik, qaltis harakatlarni amalga oshirmaslikni so‘radi. Bu haqda tashkilot bosh kotibining rasmiy vakili Stefan Dyujarrik ma’lum qilgan.
“BMTning Donbassdagi to‘qnashuvlarda tinch aholi orasida qurbonlar borligidan xavotiri ortgan, tashkilot harbiy harakatlarning zudlik bilan to‘xtatilishini talab qiladi, tomonlardan har qanday harakat va keskin bayonotlardan maksimal darajada tiyilishni so‘raydi”, — deyiladi xabarda.
Dyujarrik tashkilotning Ukraina mustaqilligi, suvereniteti va xalqaro tan olingan chegaralardagi hududiy yaxlitligini qo‘llab-quvvatlashini qo‘shimcha qilgan.
Avvalroq DXR va LXR rahbarlari Rossiya prezidenti Vladimir Putinga murojaat yo‘llab, ularning mustaqilligini tan olishni so‘ragan. Putin o‘z navbatida ikki hudud rahbarlari tomonidan bildirilgan taklifni Rossiya Xavfsizlik kengashining navbatdan tashqari yig‘ilishida muhokamaga qo‘ygandi. Undan oldin Rossiya davlat dumasi DXR hamda LXR mustaqilligini tan olish yuzasidan qonun hujjati loyihasi bilan prezidentga murojaat qilgan.
Ukraina, Yevropa ittifoqi hamda AQSh rasmiylari Donbass hududidagi respublikalar mustaqilligini tan olish Minsk kelishuvlariga zid ekanligini ta’kidlagan.
14-fevralda BMT bosh kotibi Antoniu Gutterish Rossiya tashqi ishlar vaziri Sergey Lavrov bilan videoformatda muzokaralar olib borgan, shu bilan birga Ukraina TIV rahbari Dmitriy Kuleba bilan ham muloqot qilgandi. Gutterish ikkala vazir bilan ham suhbatda Ukraina atrofidagi keskin vaziyatdan xavotirda ekanligini ta’kidlagan.
Izoh (0)