Samarqand shahrida dori vositalarining noqonuniy muomalaga kiritilishining oldi olindi, deb xabar beradi Bosh prokuratura huzuridagi departament.
Ma’lum qilinishicha, departamentning Samarqand viloyati boshqarmasi tomonidan IIB bilan hamkorlikda tezkor tadbir o‘tkazilgan. Tadbirda fuqaro N.Yu. dori vositalarini dorixona va ularning filiallaridan tashqarida muomalaga kiritish orqali daromad orttirishni ko‘zlagani aniqlangan. U fuqaro M.ga xorijda ishlab chiqarilgan COVID-19 infeksiyasini davolashda keng qo‘llanadigan “Remdesivir” nomli dori vositasini har birini 350 ming so‘mdan sotishga kelishgan. N.Yu. mazkur dori vositalarining 500 donasini 16,3 ming dollarga sotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 186-3-moddasi (dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkentda 8145 dona “Tropikamid” va boshqa kuchli ta’sir qiluvchi dori vositalarining noqonuniy aylanmasiga chek qo‘yilgani, Toshkent viloyatida dori vositalarini noqonuniy ravishda muomalaga kiritgan shaxs ushlangani to‘g‘risida xabar berilgandi.
Izoh (0)