Самарқандда 16,3 минг долларга «Ремдесивир» дорисини ноқонуний сотишга уринган шахс ушланди

Самарқанд шаҳрида дори воситаларининг ноқонуний муомалага киритилишининг олди олинди, деб хабар беради Бош прокуратура ҳузуридаги департамент.

Маълум қилинишича, департаментнинг Самарқанд вилояти бошқармаси томонидан ИИБ билан ҳамкорликда тезкор тадбир ўтказилган. Тадбирда фуқаро Н.Ю. дори воситаларини дорихона ва уларнинг филиалларидан ташқарида муомалага киритиш орқали даромад орттиришни кўзлагани аниқланган. У фуқаро М.га хорижда ишлаб чиқарилган COVID-19 инфекциясини даволашда кенг қўлланадиган «Ремдесивир» номли дори воситасини ҳар бирини 350 минг сўмдан сотишга келишган. Н.Ю. мазкур дори воситаларининг 500 донасини 16,3 минг долларга сотган вақтида ашёвий далиллар билан ушланган.

Мазкур ҳолат юзасидан Жиноят кодексининг 186-3-моддаси (дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.

Аввалроқ Тошкентда 8145 дона «Тропикамид» ва бошқа кучли таъсир қилувчи дори воситаларининг ноқонуний айланмасига чек қўйилгани, Тошкент вилоятида дори воситаларини ноқонуний равишда муомалага киритган шахс ушлангани тўғрисида хабар берилганди.